پی آئی اے کے 2 مسافروں پر ’فردِ جرم عائد‘

Image caption پاکستانی طیارے کو مانچسٹر کی بجائے لندن کے سٹین سٹیڈ ہوائی اڈے پر اتار لیا گیا تھا

برطانیہ میں دو افراد پر پاکستانی فضائی کمپنی پی آئی اے کے طیارے کو نقصان پہنچانے کی کوشش کے الزام کے تحت فردِ جرم عائد کی گئی ہے۔

یہ دونوں افراد تیس سالہ طیب سبحانی اور اکتالیس سالہ محمد صفدر برطانوی نژاد پاکستانی ہیں اور ان کا تعلق لنکاشائر کاؤنٹی کے علاقے نیلسن سے ہے۔

طیب سبحانی ٹیکسی چلاتے ہیں جبکہ محمد صفدر ایک ریستوران میں ملازم ہیں۔

ان دونوں کو پیر کو چیمسفرڈ میں مجسٹریٹ کی عدالت میں پیش کیا جائے گا۔

یہ واقعہ گزشتہ جمعہ کو پیش آیا تھا جب لاہور سے مانچسٹر جانے والے طیارے میں دورانِ پرواز چند مسافروں کے درمیان جھگڑا ہو گیا تھا اور عملے کی جانب سے بیچ بچاؤ کی کوشش کے دوران جہاز کو نقصان پہنچانے کی دھمکیاں دی گئی تھیں۔

جب طیارے کے کپتان کی جانب سے اس صورتحال سے کنٹرول ٹاور کو مطلع کیا گیا تو برطانوی فضائیہ کے جیٹ طیاروں کے حفاظتی حصار میں پاکستانی طیارے کو مانچسٹر کی بجائے لندن کے سٹین سٹیڈ ہوائی اڈے پر اتار لیا گیا تھا۔

طیارہ اترنے کے بعد ایسکس کاؤنٹی کی پولیس نے طیارے سے طیب سبحانی اور محمد صفدر کو حراست میں لے لیا تھا جبکہ ایک طویل انتظار کے بعد باقی مسافروں کو مانچسٹر پہنچا دیا گیا تھا۔

اسی بارے میں