سعودی عرب: خواتین گاڑی چلائیں گی تو کارروائی ہوگی

Image caption درجنوں خواتین نے اپنی ویڈیوز آن لائن پوسٹ کی ہیں جن میں انھیں مختلف سعودی شہروں میں ڈرائیونگ کرتے ہوئے دکھایا گیا ہے

سعودی عرب کی وزراتِ داخلہ کے ترجمان نے سعودی عورتوں کو خبردار کیا ہے کہ اگر انہوں نے خواتین کی ڈرائیونگ پر عائد پابندی کے خلاف مہم میں حصہ لیا تو ان کے خلاف کارروائی کی جائے گی۔

عورتوں کو ڈرائیونگ کا اختیار دلوانے کے لیے جاری مہم سنیچر کو اپنے عروج پر ہوگی۔ مہم چلانے والوں نے خواتین سے کہا ہے کہ وہ اس دن پابندی کے خلاف احتجاجاً گاڑی چلائیں۔

سعودی شاہ کے قدامت پسند مشیر برخاست

’عورتوں کی ڈرائیونگ نسوانیت کے لیے خطرہ‘

یہ اپنی نوعیت کا تیسرا احتجاج ہے۔ پہلی مرتبہ 1990 میں متعدد خواتین کو حراست میں لیا گیا اور کئی نے اپنی ملازمتیں گنوا دیں۔

وزراتِ داخلہ کے ترجمان منصور الترکی نے خواتین ڈرائیوروں کی مہم کے بارے میں سعودی حکومت کا سخت موقف واضح طور پر بیان کر دیا ہے۔

اس سے پہلے بدھ کو آنے والے بیان میں ابہام تھا، جس کی وجہ سے اس مہم کے حامی اور مخالفین دونوں ہی اسے اپنے حق میں تصور کر رہے تھے۔

لیکن اب منصور الترکی نے واضح بیان دیا ہے کہ ’عورتوں کے گاڑی چلانے پر پابندی ہے اور اس کی خلاف ورزی کرنے والوں اور ان کے حمایتیوں کے خلاف کارروائی کی جائے گی‘۔ تاہم انہوں نے اس کارروائی کی وضاحت نہیں کی۔

خواتین کے گاڑی چلانے پر عائد پابندی کے خلاف مہم کی ایک کارکن ذکی صفر کا کہنا ہے کہ پابندی سے متعلق یہ بیان غیر معمولی طور پر واضح ہے۔

’اب یہ غلط فہمی دور ہو گئی ہے کہ حکومت خود اس پابندی کی حمایت نہیں کرتی۔‘

انہوں نے مزید کہا ’نہیں، ترجمان بہت واضح تھا اور 26 تاریخ کو جو عورت گاڑی چلائے گی اسے سزا ملے گی۔‘

لیکن ذکی صفر سمجھتی ہیں کہ حکومت اب بھی ملے جلے پیغام دے رہی ہے کیونکہ پابندی اٹھائے جانے کے معاملے پر وہ خود منقسم ہے۔

اس ہفتے کے اوائل میں دارالحکومت ریاض کی شاہی عدالت میں سو قدامت پرست علما نے لوگوں سے کہا تھا کہ وہ اس مہم کی مذمت کریں کیونکہ یہ عورتوں کی سازش اور ملک کے لیے خطرہ ہے۔

لیکن اسے معاملے پر 1990 میں ہونے والے دوسرے احتجاجی مظاہرے پر حکام کے رویّے سے معلوم ہوتا ہے کہ حکومت میں سخت گیر موقف رکھنے والے لوگ اب بہت کم ہیں۔

احتجاج کی تازہ لہر میں درجنوں خواتین نے اپنی ویڈیوز آن لائن پوسٹ کی ہیں جن میں انھیں مختلف سعودی شہروں میں ڈرائیونگ کرتے ہوئے دکھایا گیا ہے۔

اس مہم کے کارکنوں کا کہنا ہے کہ اب معاشرے کا چلن تبدیل ہو رہا ہے اور اب مردوں سمیت لوگوں کی بڑی تعداد اس پابندی کے خاتمے کے حق میں ہے۔

اس حوالے سے ایک عرض داشت پر سترہ ہزار لوگوں نے دستخط کیے ہیں، جس میں کہا گیا ہے کہ یا تو اس قانون میں تبدیلی کی جائے یا واضح کیا جائے کہ یہ کیوں لاگو رہے؟

اسی بارے میں