متعصبانہ لفظ کے استعمال پر میڈونا کی معافی

تصویر کے کاپی رائٹ Getty
Image caption میڈونا اپنے بیٹے روکو رچی کے ہمراہ

امریکی پاپ گلوکارہ میڈونا نے اپنے بیٹے کے لیے سیاہ فام افراد کے لیے مخصوص معتصبانہ لفظ استعمال کرنے پر معافی مانگی ہے۔

میڈونا نے جمعے کی رات اپنے 13 سالہ بیٹے روکو رچی کی باکسنگ کرتے ہوئے تصویر انٹرنیٹ پر اپ لوڈ کی، اور متعصبانہ لفظ ہیش ٹیگ کے ساتھ لگا دیا۔

انھوں نے ہفتے کو جاری کردہ ایک بیان میں کہا: ’اگر میں نے ’این کا لفظ‘ استعمال کر کے کسی کے جذبات مجروح کیے ہوں تو مجھے اس پر افسوس ہے۔

’میرا مطلب نسلی تعصب پر مبنی گالی دینا نہیں تھا۔ میں نسل پرست نہیں ہوں، (تاہم) اس لفظ کے استعمال کا کوئی جواز پیش نہیں کیا جا سکتا۔‘

جب میڈونا نے "#disnigga پیغام انسٹاگرام پر نشر کیا تو ان کے 11 لاکھ مداحوں میں سے کچھ نے اس پر اعتراض کیا، جس کے بعد اسے فوراً حذف کر دیا گیا۔

اس کے بعد انھوں نے اس تصویر کے ساتھ ایک اور پیغام اپ لوڈ کیا جس میں لکھا تھا: ’چلو، میں اسے دوبارہ کرتی ہوں۔‘

تاہم ہفتے کو انھوں نے تمام پیغام ہی حذف کر دیا، اور اس کے بجائے اپنے تشہیری معاون کی وساطت سے ایک اور پیغام نشر کیا جس میں لکھا تھا: ’مجھے معاف کر دیں۔‘

انھوں نے کہا: ’سب کچھ نیت پر مبنی ہے۔ میں نے اپنے بیٹے کے لیے پیار سے یہ لفظ استعمال کیا تھا، جو سفید فام ہے۔ مجھے احساس ہے کہ یہ لفظ اشتعال انگیز ہے اور اگر اس سے لوگوں کو غلط تاثر ملا ہو تو میں معذرت کرتی ہوں۔‘

اس سے قبل نئے سال کے آغاز پر میڈونا نے اپنے بیٹے کی تصویر لگائی تھی جس میں وہ اپنے دوستوں کے ہمراہ شراب کی بوتل کے ساتھ کھڑا ہوا تھا۔ اس تصویر پر بھی تنازع اٹھ کھڑا ہوا تھا۔

اسی بارے میں