ایئر ایشیا کا کاکپٹ وائس ریکارڈر مل گیا ہے: حکام

تصویر کے کاپی رائٹ AP
Image caption پیر کو ایئر ایشیا طیارے کا بلیک باکس جاوا سمندر کی تہہ میں ملا تھا جسے انڈونیشیا کے دارالحکومت پہنچا دیا گيا ہے

انڈونیشیا میں حکام کا کہنا ہے کہ غوطہ خوروں نے جاوا سمندر سے حادثے کا شکار ایئر ایشیا کی پرواز کیو زیڈ 8501 کا کاک پٹ وائس ریکارڈر حاصل کر لیا ہے۔

پیر کو ایئر ایشیا کی پرواز کا بلیک باکس کے ملنے کے ایک دن بعد منگل کو یہ کاک پٹ وائس ریکارڈر ملا ہے۔

ایئر ایشیا کا یہ جہاز جس پر 162 افراد سوار تھے، گذشتہ ماہ 28 دسمبر کو انڈونیشیا کے شہر سورابایا سے سنگاپور جاتے ہوئے خراب موسم میں گر گیا تھا۔

حکام کا کہنا ہے سمندر سے لاشیں نکالنے کا سلسلہ جاری ہے اور اب تک 48 لاشیں نکالی جا چکی ہیں تاہم بہت سی لاشیں ابھی ملبے میں ہی پھنسی ہوئی ہیں۔

حکام کے مطابق بلیک باکس اور کاک پٹ وائس ریکارڈر کے ملنے کے بعد ان دونوں کی مدد سے تفتیش کرنے والوں کو حادثے کا شکار طیارے کے ساتھ پیش آنے والے واقعات کی تفصیل مل سکے گی۔

ایئر ایشیا کی پرواز تلاش کرنے والی ٹیم نے پیر کو بتایا کہ انھوں نے سمندر کی تہہ میں طیارے کے ملبے کے نیچے ایسی چیز دیکھی ہے جو کہ وائس ریکارڈر ہو سکتی ہے۔

تصویر کے کاپی رائٹ .
Image caption گذشتہ دنوں ایئر ایشیا کے حادثے کا شکار طیارے کا عقبی حصہ پانی سے باہر نکالا گیا تھا لیکن بلیک باکس اس میں نہیں تھا

سرچ اینڈ ریسکیو ایجنسی کے سربراوں نے فوری طور پر وائس ریکارڈر کے ملنے کی تصدیق نہیں کی ہے تاہم بعد میں اس کے باضابطہ اعلان کا امکان ہے۔

اس طیارے کی تلاش میں شامل ایک اہلکار نے صحافیوں کو بتایا ’اس آلے کو حاصل کر لیا گیا ہے اور اب یہ جاوا سمندر میں موجود انڈونیشیا کی بندا ایسیہ جنگی جہاز پر موجود ہے۔‘

بی بی سی کی کرشما واسوانی کا کہنا ہے کہ وائس ریکارڈر جس میں پائلٹوں کی تمام باتیں ریکارڈ ہوتی رہتی ہیں اسے دارالحکومت جکارتا لایا جا رہا ہے جہاں ماہرین اس کی جانچ کریں گے۔

فلائٹ ڈیٹا ریکارڈر میں طیارے کی رفتار، اس کی بلندی اور دیگر تکنیکی معلومات ریکارڈ ہوتی ہیں جو پہلے ہی دارالحکومت میں موجود ہیں۔

گذشتہ دنوں ایئر ایشیا کے حادثے کا شکار طیارے کا عقبی حصہ پانی سے باہر نکالا گیا تھا تاہم اس میں بلیک باکس موجود نہیں تھا۔

جہاز کے گرنے کی وجہ تو ابھی معلوم نہیں ہوسکی مگر پائلٹ نے خراب موسم کے باعث پرواز کا راستہ تبدیل کرنے کی درخواست کی تھی۔

اسی بارے میں