قاہرہ میں اطالوی قونصل خانے کے باہر کار بم دھماکہ

تصویر کے کاپی رائٹ VEDIO7
Image caption اٹلی کے قونصل خانے کو کار بم دھماکے میں نشانہ بنایا گیا

مصر کے دارالحکومت قاہرہ میں دھماکے کے نتیجے میں اطالوی قونصل خانےکو شدید نقصان پہنچا ہے جبکہ واقعے میں چار افراد کے زخمی ہونے کی تصدیق ہوئی ہے۔

ایک سرکاری اہلکار کے حوالے سے مصر کی خبر رساں ایجنسی مینا نے بتایا ہے کہ یہ دھماکہ سنیچر کی صبح اطالوی قونصل خانے کے بار موجود ایک کار کے ذریعے کیا گیا۔

ابھی تک کسی تنظیم کی جانب سے اس دھماکے کی ذمہ داری قبول نہیں کی گئ۔

خیال رہے کہ مصر میں گذشتہ ماہ ایک کار بم دھماکے میں پبلک پراسیکیوٹر ہشام برکت ہلاک ہوئے تھے۔

اسی مہینے کے دوران کار بم دھماکے میں ہی مصر کے ایک پولیس سٹیشن کو نشانہ بنایا گیا تھا جس میں تین افراد ہلاک ہوگئے تھے۔

مصری فوج بھی دولتِ اسلامیہ کے خلاف جنگ لڑ رہی ہے تاہم ان کا دائرہ کار صحرائے سینا تک محدود ہے۔

گذشتہ دو ماہ کے دوران پولیس اور فوج کے 600 اہلکار ہلاک ہو چکے ہیں۔

ملک میں ہونے والے دہشت گردی کے واقعات میں جولائی 2013 کے بعد تیزی آئی۔ یہ وہ وقت تھا جب صدر مرسی کی حکومت پرطرف ہو گئی تھی۔

حالیہ ہفتوں میں موجودہ صدر السیسی نے وعدہ کیا تھا کہ وہ اسلامی شدت پسندوں کے خلاف مزید کارروائی کریں گے۔

دوسری جانب سابق صدر مرسی سمیت سینکڑوں افراد کو موت کی سزائے سنائی گئی۔