عراق: دولت اسلامیہ کے ہاتھوں امریکی فوجی کی ہلاکت

تصویر کے کاپی رائٹ AFP
Image caption امریکی فوجی عراق میں پیشمرگا فورسز کی مشاورت بھی کر رہے ہیں

امریکی محکمہ دفاع کے حکام کا کہنا ہے کہ شمالی عراق میں خود کو دولتِ اسلامیہ کہنے والی شدت پسند تنظیم دولت اسلامیہ نے ایک امریکی فوجی کو ہلاک کر دیا ہے۔

یہ امریکی فوجی دولتِ اسلامیہ کے خلاف لڑنے والی تنظیم کرد پیشمرگا کی مدد کے لیے تعینات تھا۔

ہلاک ہونے والے اس فوجی کا نام چارلی کیٹنگ بتایا گیا ہے۔ 31 سالہ جنگی ماہر نیوی سیل کا تعلق امریکی ریاست ایریزونا سے تھا۔

پیشمرگا حکام کا کہنا ہے کہ منگل کی صبح جنگجوؤں نے دولت اسلامیہ کے زیر قبضہ شہر موصل کے شمال میں فرنٹ لائن کو عبور کیا۔

سنہ 2014 میں دولت اسلامیہ کے خلاف امریکہ اور اس کے اتحادیوں کی جانب سے جنگ کا آغاز کرنے کے بعد سے اب تک میدان جنگ میں ہلاک ہونے والے یہ تیسرے امریکی فوجی ہیں۔

تاہم عراقی حکومتی فورسز امریکی اتحادیوں کی جانب سے کیے جانے والے فضائی حملوں اور فوجی مشاورت کی مدد سے دولت اسلامیہ کو بتدریج پیچھے دھکیلنے میں کامیاب ہوئی ہیں لیکن اب بھی شدت پسند تنظیم کو ملک کے شمال اور مغرب میں بڑے پیمانے پر کنٹرول حاصل ہے۔

امریکی نیوی سیل کی ہلاکت کا اعلان کرتے ہوئے امریکی وزیر دفاع ایشٹن کارٹر نے صرف اتنا ہی کہا کہ ’عراقی علاقے اربل میں دشمن کی فائرنگ میں ایک امریکی فوجی مارا گیا ہے۔‘

تصویر کے کاپی رائٹ Reuters

ایشٹن کارٹر نے جرمنی میں صحافیوں سے بات کرتے ہوئے کہا کہ ’لازمی طور پر یہ دوران جنگ موت ہے اور بہت افسوسناک نقصان ہے۔‘

بعد ازاں عراق میں امریکی حکام کا کہنا تھا کہ فوجی کو دولت اسلامیہ کی جانب سے پیشمرگا کی چوکی سے تین سے پانچ کلومیٹر دور سے براہ راست گولی مار کر ہلاک کیا گیا۔

پیشمرگا فورسز کے ترجمان میجر جنرل جابر یاور نے خبر رساں ادارے ایسوسی ایٹڈ پریس کو بتایا ہے کہ منگل کے روز دولت اسلامیہ کے جنجگوؤں نے قصبے تل ازقوف پر چڑھائی کر دی تھی لیکن بعد میں پیشمرگا فورسز انھیں قصبے سے باہر نکالنے میں کامیاب ہو گئیں۔

کرد ذرائع نے بی بی سی کو بتایا کہ موصل کے مشرق میں وردک کے مقام پر کیے جانے والے حملے کو بھی ناکام بنایا گیا۔

اس وقت عراق میں 5500 سے زائد امریکی فوجی موجود ہیں جن میں سے 3870 کے قریب فوجی دولت اسلامیہ کے خلاف لڑنے والی مقامی فورسز کی مشاورت اور مدد کرنے کے لیے تعینات کیے گئے ہیں۔

اسی بارے میں