’شمالی کوریا اب امریکی تنصیبات کو نشانہ بنا سکتا ہے‘

تصویر کے کاپی رائٹ Reuters
Image caption شمالی کوریا نے گذشتہ دو ماہ کے دوران اس سے پہلے چار میزائل تجربات کیے تھے

شمالی کوریا کے رہبر اعلیٰ کم یونگ ان کا کہنا ہے کہ ان کے ملک کی جانب سے کیے جانے والے نئے میزائل تجربات کے بعد ان کے پاس امریکی تنصیبات کو نشانہ بنانے کی صلاحیت آ گئی ہے۔

کم یونگ ان نے یہ بات گذشتہ روز بدھ کو درمیانے فاصلے تک مار کرنے والے دو بیلسٹک میزائلوں کے تجربات کے بعد کہی۔

ان کا کہنا تھا کہ’ہمارے پاس مجموعی اور عملی طور پر بحرالکاہل میں امریکی تنصیبات پر حملہ کرنے کی صلاحیت موجود ہے۔‘

٭ ’شمالی کوریا امریکہ کے خلاف اپنا دفاع کر سکتا ہے‘

٭ شمالی کوریا کا ینگ باین جوہری ری ایکٹر’دوبارہ فعال‘

امریکہ اور جنوبی کوریا کا اس حوالے سے کہنا ہےکہ پہلا میزائل تجربہ ناکام ہوا جبکہ دوسرا میزائل چار سو کلومیٹر دور اور ایک ہزار کلو میٹر اونچا گیا۔

ان تجربات کے بعد اقوام متحدہ کی سکیورٹی کانسل نے ایک ہنگامی اجلاس طلب کر لیا۔

اقوام متحدہ کے سیکریٹری جنرل بان کی مون کے ترجمان کا کہنا ہے کہ ’یہ تجربات جان بوجھ کر کیے گئے اور شمالی کوریا کی جانب سے یہ بین الاقوامی پابندیوں انتہائی خلاف ورزی ہے۔‘

خیال رہے کہ گذشتہ روز جنوبی کوریا کے مطابق شمالی کوریا نے اقوام متحدہ کی پابندیوں کے خلاف ورزی کرتے ہوئے درمیانے فاصلے تک مار کرنے والے دو بیلسٹک میزائلوں کے تجربے کیے تھے۔

تصویر کے کاپی رائٹ AFP

جنوبی کوریا کے فوجی حکام کا کہنا تھا کہ دونوں طاقتور موسودان میزائل تھے تاہم ان میں سے ایک کا تجربہ ناکام ہوگیا جبکہ دوسرا چار سو کلومیٹر کا فاصلہ طے کرنے کے بعد سمندر میں گرگیا۔

خیال رہے کہ شمالی کوریا کے جوہری پروگرام کی وجہ سے اقوام متحدہ نے اس پر کسی قسم کے بیلسٹک میزائل کے تجربے پر پابندی عائد کر رکھی ہے۔

شمالی کوریا نے گذشتہ دو ماہ کے دوران اس سے پہلے چار میزائل تجربات کیے تھے اور اطلاعات کے مطابق یہ تمام ناکام رہے۔

جاپان کے وزیراعظم شنزو آبے نے کہا ہے کہ بیلسٹک میزائل تجربات کی تصدیق ہوئی ہے اور انھیں واضح طور پر برداشت نہیں کیا جائے گا۔

شمالی کوریا کے ہمسایہ ممالک نے گذشتہ دنوں ہی میزائل تجربات کی تیاریوں کی نشاندہی کرتے ہوئے اس کے بارے میں خبردار کیا تھا۔

اسی بارے میں