امریکہ میں جہاز کے حادثے میں تین شادی شدہ جوڑے ہلاک

تصویر کے کاپی رائٹ AP
Image caption جہاز پرواز کے فوری بعد گر کر تباہ ہو گیا

امریکی ریاست الاباما میں ایک چھوٹا طیارہ گرنے کے نتیجے میں چھ افراد ہلاک ہو گئے ہیں۔

مقامی ذرائع ابلاغ کا کہنا ہے کہ ہلاک ہونے تین شادی شدہ جوڑے تھے۔

حکام کے مطابق ٹسکالوسا کے ایئر پورٹ سے پرواز کے فوری بعد جہاز سے خرابی کا پیغام موصول ہوا اور رن وے کے قریب گر کر تباہ ہو گیا۔

اطلاعات کے مطابق جہاز میں سوار تینوں جوڑے فلوریڈا میں ڈینٹل کانفرنس میں شرکت کے بعد واپس اوکسفرڈ جا رہے تھے۔

مقامی اخبار ایگل کے مطابق جہاز میں کوئی بچہ سوار نہیں تھا تاہم حادثے میں ہلاک ہونے والوں کے 11 بچے ہیں۔

ٹسکالوسا کے قریب نارتھ پورٹ کیمونٹی کے میئر کے مطابق جہاز ایئر پورٹ کے قریب درختوں میں گر کر تباہ ہو گیا اور امدادی عملہ تین منٹ کے اندر جہاز کے ملبے تک پہنچ گیا تھا۔

الاباما کے ٹی وی ڈبلیو بی آر سی نے ایک رشتہ دار کے حوالے سے بتایا ہے کہ ہلاک ہونے والوں میں دندان ساز میاں بیوی جیسن اور لی شامل ہیں۔

اوکسفرڈ ایگل کے مطابق دونوں کے تین بچے تھے اور ان کی عمر دس، سات اور پانچ برس ہے جبکہ حادثے میں ہلاک ہونے والے ایک اور میاں بیوی کے پانچ بچے تھے۔

اسی بارے میں