امریکہ کے شہر نیویارک میں دھماکہ،29 افراد زخمی

Image caption امدادی کارکنوں کے مطابق زخمیوں میں سے کسی کی بھی حالت تشویش ناک نہیں ہے

امریکہ میں حکام کا کہنا ہے کہ سنیچر کی شام نیویارک سٹی میں ہونے والے دھماکے کے نتیجے میں کم سے کم 29 افراد زخمی ہو گئے ہیں جبکہ کسی ہلاکت کی اطلاعات نہیں ہیں۔

نیویارک کے میئر نے اسے ’دانستہ کارروائی‘ سے تعبیر کیا ہے۔

عینی شاہدین کا کہنا ہے کہ آگ بجھانے والی گاڑیاں اور ایمبولیسنز جائے وقوعہ پر پہنچ چکی ہیں اور زخمیوں کو ہسپتال منتقل کیا گیا ہے۔

پولیس کا کہنا ہے اس کے لیے کوئی دھماکہ خیز مادہ استعمال کیا گیا ہے۔ پولیس جائے وقوعہ سے چند بلاک کے فاصلے پر ایک دوسری مشتبہ چیز کی تفتیش کر رہی ہے جبکہ امریکی میڈیا کا کہنا ہے کہ یہ مشتبہ شے ایک پریشر کوکر ہے جس سے کئی برقی تار باہر نکل رہے ہیں۔

نیویارک کے میئر بل دا بلیسیو نے کہا ہے کہ ’مینہٹن ضلعے چیلسی ہونے والا دھماکہ دانستہ کارروائی ہے۔ تاہم انھوں نے کہا ہے کہ اس کا یا پھر اس سے قبل پڑوسی نیو جرسی میں ہونے والے دھماکے کا کسی دہشت گرد گروپ سے کوئی تعلق نہیں۔‘

تصویر کے کاپی رائٹ AFP
Image caption زخمیوں کو ہسپتال منقل کیا گیا ہے

خیال رہے کہ نیوجرسی میں ہونے والا دھماکہ ایک فوجی خیر سگالی ریس کے دوران ہوا تھا۔

حکام کے مطابق ایف بی آئی اور ہوم لینڈ سکیورٹی کے اہلکار موقعے پر پہنچ چکے ہیں۔

نیویارک میں آگ بجھانے والے ادارے کا کہنا ہے کہ ڈسٹرک مینہیٹن کے علاقے چیلسی میں دھماکہ مقامی وقت کے مطابق شام نو بجے سنائی دیا گیا ہے۔

امدادی کارکنوں کے مطابق زخمیوں میں سے ایک کے علاوہ کسی کی بھی حالت تشویش ناک نہیں ہے۔

عینی شاہدین کے مطابق دھماکہ رہائشی علاقے کے قریب ہوا اور اس کی آواز کافی بلند تھی اور دھماکے کے بعد لوگ یہاں وہاں بھاگتے دکھائی دیے۔

تصویر کے کاپی رائٹ Reuters
Image caption یہ دھماکہ ایک بھیڑ والے علاقے میں ہوا ہے

غیر مصدقہ اطلاعات کے مطابق دھماکہ ایک کوڑے دان میں ہوا۔ پولیس ٹوئٹر پر شیئر کی جانی والی تصاویر سے متعلق تحقیقات کر رہی ہے۔

اس سے چند گھنٹے پہلے ہی نیو جرسی میں ایک پائپ بم کا دھماکہ ہوا ہے جہاں ایک فلاحی ادارے کی جانب سے منعقدہ دوڑ میں ہزاروں افراد شریک تھے۔ تاہم اس دھماکے میں کسی کے زخمی ہونے کی اطلاع نہیں ملی۔

متعلقہ عنوانات