بیرلشگن ملت لر خادملری سقله نه یاتگان منطقه انیق لنگن

پولیس کوچلرینی ایتشچه بیرلشگن ملت لر خادملری سقله نه یاتگان بولگن احتمالی منطقه اطرافی خوف سیزلیک کوچلری تمانیدن اورب آلینگن .

اما اولرنی آزاد ایتیش اوچون منطقه ایچگه کیرب باریلمه گن.

احمد زی جنابلرینی تاکید له شیچه، کیچه پلخمری و سمنگان شاه یولیدن اوغیرلنگن بیرلشگن ملت لرنینگ افغانستان لیک خادم لری سقله نه یاتگان ییر پولیس گه معلوم اما اولرگه ضرر یتمسدن آزاد ایتلیش لری اوچون قوتقیزیش عملیات لری سیکین راق دوام ایتماقده.

بیرلشگن ملت لر تشکیلاتی نینگ سوزچی سی دان مک نورتون هم، تناوون نامعلوم شخص لر تمانیدن اوغیرلنگن خادم لری حقیده حاضرگه چه بیرار بیر انیق معلومات قولگه کیلتره آلمه گن لیک لرینی ایتدی.

بیرلشگن ملت لر تشکیلاتی سوزچی سیگه کوره اولر افغانستان خوف سیزلیک کوچلری نظرگه توتگن قوتقیزیش چاره تدبیرلری نیتجه لریینی کوتیشماقته اما حاضر گه چه بو خصوصده ایجابی سیلجیش بولمه گن لیگی نی ایتدی.

تناوون بیرلشگن ملت لر نینگ بیش کیشی افغانستان لیک خادم لری بغلان ولایتی نینگ دند غوری منطقه سیده نامعلوم قوراللی کیشی لر تمانیدن اوغیرله نیب کیتلگن ایدی.

حاضرگه چه هیچ بیر گروه اوشبو حادثه مسولیت نی اوز بوینگه الگه نی یوق.

افغانستان شمالیده گی بغلان و قندوز ولایت لریده یوز بیرگن کوپلب ناتینچ لیک لرگه ایسه حزب اسلامی و عصیانچی طالب لر مسول دیب کوریله دی.

بیرلشگن ملت لر تشکیلاتیگه کوره، اوغیرلنگن بیش کیشی افغانستان وطنداشی بولیب اوشبو تشکیلات نینگ یو ان او پی اس ناملی بولمیده فعالیت الیب باره دی.

سونگی وقتلرده افغانستان شمالیده گی قندوز وبغلان ولایت لری شاه یوللری اوشبو یوللردن قتنه یاتگان اهالی و خصوصا خارجیلر و خارجی تشکیلات لرده فعالیت الیب باره یاتگان شخص لر اوچون خوف لی بولگن.

بوندن بیرنیچه کون الدین قندوز و بغلان شاه یولیدن جاپان لیک بیر ژورنالیست قوراللی لر تمانیدن الیب کیتلگن ایدی.