کابل تاغلریده قولب توشگن اوچاق پارچه لر تاپلدی

Image caption اوچاق قالدیقلری سالنگ تاغلری نینگ 4000 مترلیک بلند لیگی ده تاپلگن.

افغانستانده قیدیرو گروه لری پایتخت کابل شمالیده گی سالنگ تاغلریده هلاکتگه اوچره گن یولاوچی اوچاق پارچه لری پیدا بولگن حدوده ایتیب باریشگن.

افغانستان ترانسپورت وزیری محمدالله بتاش هلاکت جایده بیر نیجه جسدلر بارلیگی ، اما اوچاق ایچیده بولگن 44 کیشی دن بیران -بیرنفرنینگ امان قالگنی نشانهلری یوقلیگنی ایتگن.

تاپلگن جسد لرکابل ده گی تورت یوز یاتاقلی کسل خانه سیگه آلیب کیلترلگن.کابل گه کیلترلگن جسد لرنی یمان احوالده بولگنی ایتلماقده.

پامیر هوا یوللریگه تیگشلی یولاوچی اوچاق دوشنبه کونی قندوز دن کابلگه پرواز قیلگن و منزلگه یقین قالگنده شکردره تاغلی حدوده قولب توشگندی.

هلاکت سبب لری انیقلنمهگن

"قولب توشگن اوچاق نینگ پارچه لری قرشیمده یاتیبدی. اطرافده بیر نیچه جسدلر بار"دیب ایتگن بتاش جنابلری مطبوعات واسطه لریدن بیریگه.

بیران کیم نینگ امان قالگنی حقیده گپریشگه هلی ییرته .اما حاضرگه قدر بیز بیران کیشنی تیریک کورمه دیک و بو ییرده گی آب –هوا وضعیتی یمان-ساووق، قار، شمال ."دییه معلومات بیرگن افغان رسمی سی .

اونگه کوره "قتیق شمال" قیدیروعملیاتنی مشکللشترماقده.اما قیدیروچیلر برچه جسدلرنی تاپمگونلریچه حدودنی ترک ایتیش نیتلری یوقلیگنی ایتیشگن.

قیدیرو اوچاغی پنچشنبه کونی حادثه جاینی انیقلشگه موفق بولگندی. اوچاق قالدیقلری سالنگ تاغلری نینگ 4000 مترلیک بلند لیگی ده تاپلگن.

ناتو توشرگن تصویرلرده یولاوچی اوچاغی تورت بولککه اجره لیب کیتگنی واطرافده گی تاغلر اره سیده ساچیلیب یاتگنی عکس ایتگندی.

کابل ده گی رسمی لر اوچاق فعالیت لرینی دواملی روشده قید قیله یاتگن اوچاق نینگ قاره قوطی اسکونه سی تاپلگنینی هم معلوم قیلگنلر.

اوچاق ایچیده آلتی نفر خارجیلیک بولگن، اولردن اوچ نفری بریتانیا و بیر امریکا وطنداشی ایکنی ایتله دی .