اوشده گی زوروانلیک لرده کمیده 39 کیشی قربان بولدی

Image caption قومی زوروانلیکلر قرغیزستان نینگ اوزبیک نشین منطقه سیده گی اوش ولایتیده روی بیرگن.

قرغیزستان ساغلیقنی سقلش وزیرلیگی گه کوره ، مملکت جنوبیده یوز بیرگن قومی زوروانلیکلرده کمیده 39 کیشی قربان بولگن.580 دن آرتیقراق انسان یاره لنگن.

یاره لنگن لردن 300 دن آرتیقراغی کسل خانه گه یاتقیزلیب ، قیرققه یقین یاره لنگنلرنینگ احوالی آغر ایکنی ایتلماقده.

قرغیزستان نینگ اوش شهریده کوپلب اوزبیک لر استقامت قیله دی .

محللی خبرلرگه کوره ، اوتگن تونده جنوبی اوش شهریده گی "اولای"مهمانخانه سی یقینیده تورلی مللیتگه منسوب اوزارا رقیب گروهلر آره سیده گی جنجل قوراللی آتشمه لرگه ایلهنیب کیتگن.

گروهلراوز طرفدار لرینی دعوت قیلیشلری نتیجه سیده اوشه یرده کوپ سانده انسانلر یغیلگن.

پلیس آسمانگه قره ته اوق آتیب ، یغیلگن شخص لرنی ترقه تیشگه اورینگن اما بو حرکت لر ثمره بیرمه گن.

کیینچه لیک زوروانلیکلر شهر نینگ تورلی منطقه لریگه قدر ترقه گن.

اوش شهر "فیلرمانیه " یا موسیقی مرکزی ، اوزبیک دراما تیاتر داخل بیر قطار بنا لرگه اوت قویلگن.

جمعه کونی پیشین وقتی "فرونزه " بازاری و یقین اطرافیده گی بیر قطار ییرک سودا مرکزلری هنوز توته ب یاتگندی.

رسمی لرگه کوره، 10 گه یقین بناگه اوت قوییلگن، اما گروه لر اوت قوییلگن بنا لر سانی انچه یین کوپراق دیماقده لر .

شاشلینچ یغیلگن موقت حکومت "اوش" و "اوزگان" شهرلری بیلن "اره وان" و "قاره سو" تومنلریده 20 نچی جونگه قدر فوق العاده حالت اعلان قیلگن.

اوشگه مخصوص قوشینلر بیلن آغر حربی تخنیککه کیرتیلگن.

شهرگه موقت حکومت رهبری نینگ ایککی اورین باسری و مدافعه وزیری وظیفه سینی اوتوچی اسماعیل اسحق و لر کیلشگن.

اولرگه کوره ، اوشگه ینه قوشیمچه کوچ لر کیرتیلیشی لازمدیر.

قوشین لر مملکت جنوبی نینگ بیر نیچه ته بی قرار حدود لریده جایلشتیرلگن.

اوش شهرده کیچ ساعت 6 دن تانگی ساعت 6 گیچه گیزمه ساعتی اعلان قیلندی .

موقت قرغیز حکومتی رهبری روزه آتینبایوه ملی تلویزیون آرقه لی مراجعتیده اهالی نی بیردملیککه چقیرگن.

Image caption خلق ارا هم جمعیت دولتلری اینقسه منطقه ده گی قوشنی حکومتلر قرغیزستانده گی زوروانلیکلردن خواطر اظهار قیلگن

آتینبایوه خانم اوشده گی سونگگی واقعه لر اوزبیکستان پایتختی تاشکندده ، اوته یاتگن شانگهای همکارلیک تشکیلاتی نینگ یغینی گه علاقه سی بارلیگنی ایتگن.

"حاضر شانگهای یغینی بولیب اوتماقده. ایندی منه شو برچه اوینلرنی باشله گنلر اوزاقنی کوزه لهگن نیتلرینی تصور ایته ویرینگ، " دیب ایتگن آتینبایوه خانم .

قرغیزستان موقت رهبری نینگ ایتیشچه ، 27 ینجی جونگه ریجه لنگن ینگی اساسی قانونی قبول قیلیش بویچه رفراندوم گه قرشی چیقه یاتگنلر اسکی قدرت بیلن ینگی کوچلر اورته سیده گی مناسبت اینگ نازک-مللیت آرا –دایره سیگه اوتیشی اوچون قولدن کیلگنیچه حرکت قیلشماقده.

بشکیک ده گی امریکا ایلچی خانه سی اوشده گی وضعیت باره سیده مخصوص بیانات چیقریب ، تینچلیککه دعوت قیلدی .

بیاناتده ایتلیشیچه ، امریکا تمانی اوش شهریده گی زوروانلیکلر و قربانلر حقیده گی خبرلرنی کتته خواطرلیک بیلن کوزه تیب بارماقده .

"بیز برچه تمانلرنی کیلشموچیلیکلرنی تینچ یول بیلن، قانون دایره سیده حل ایتلیشگه دعوت قیله میز . زوروانلیک معمالرنی حل قیلیش نینگ یولی بولمسلیگی لازم،" دییله دی امریکا ایلچی خانه سی بیاناتیده.

شانگهای تشکیلاتی اوشده گی حادثه لردن خواطرده.

شانگهای همکارلیک تشکیلاتی نینگ تاشکندده بولیب اوتگن یغینده قرغیزستان جنوبیده گی وضعیتدن خواطراظهار ایتلدی.

یغین گه میزبان لیک قیلگن اوزبیکستان جمهور رئیسی اسلام کریموف قرغیزستانده گی وضعیتدن تشویش ده ایکن لیگنی ایتیب ، قرغیز خلقی گه بیردملیک اظهار قیلدی .

یغین قراریده ایتلیشچه ، تشکیلات وضعیتنی برقرار لشتریش و قرغیزستان حکومتی نینگ قانونی لیگنی تامین لش یولیده هر تمانلمه کمک بیریشگه تیار دیر .

روسیه جمهور رئیسی دیمتری مدیودیف نینگ ایتیشچه ، شانگهای همکارلیک تشکیلاتی وضعیتنی کوزه تیش اوچون قرغیزستانگه مخصوص کوزه توچی لرگروهنی یوباره دی .

شانگهای همکارلیک تشکیلاتیگه رئیس لیکنی قولگه اله یاتگن قزاقستان جمهور رئیسی نور سلطان نظر بایوف هم قرغیزستانده گی جاری حادثه لر منظره سیده منطقه ده تینچ لیک ، خوف سیزلیک و برقرارلیکنی سقلب قالیش اساسی وظیفه لریدن بیری بولیشنی بیلدردی .