اهالی گه رای بیریش حقوقینی بیروچی کارت ترقتیش برنامه سی باشلندی

افغانستان مستقل سیلاولرکمیسیون مسوللری اوشبو دستور افغانستان نینگ 34 ولایتیده یولگه قوییلگن لیگینی اورغولب، اسد آی نینگ 21سیگه چه دوام ایتیشینی معلوم قیلدی.

مستقل سیلاولر کمیسیون نینگ خبربیریشچه اوشبو دستور فقط گینه ولایت لر مرکزلریده یولگه قوییلگن، ولسوال لیک وقشلاق حدودلرده کی اهالی ایسه ولایت مرکزیدن کیلیب چپته آلیشی ریجه لشتریلگن، یعنی ولسوال لیک لرده بو دستور یولگه قوییلمه گن.

اما کوپینچه اهالی اقتصاد قیینچلیگی، امنیت یمان لیگی باعث شهرمرکزلریده کیله آلمس لیگی ممکن.

شونینگ دیک کوپلب ولسوال لیک لرنینگ تاغلی منطقه لریده جایلشگنی سببلی اهالی نینگ شهرمرکزلریده کیلیشگه توسقینلیک یره ته دی.

افغانستان مستقل سیلاولر کمیسیون نینگ سوزچیسی نورمحمد نورگه کوره اوشبو دستور آرقه لی رای کارتینی یوقاتگن، بیرمنطقه دن باشقه بیرمنطقه گه کوچگن شونینگ دیک، مهاجرت دن قیتگن کیشی لرگه رای کارتی بیریله دی.

شونینگدیک قانونی یاشینی تولدرگن کیشی لرگه هم اوشبو دستور آرقه لی رای کارتی بیریله دی.

عینی حالده، مستقل سیلاولر کمیسیونی امنیتی یمان بولگن حدودلرده امنیت یخشی بولسه اوشبو حدودلرده گی اهالیگه هم کارت بیریش برنامه سی نینگ سیار تیم لر ارقه لی یولگه قوییلیشی نی اورغوله دی.

شونگه قوشیمچه قیلیب، نور جنابلری خاتین قیزلر اوچون بوییل آسان لیک کیلتریلگنینی ایتیب ایسته مه گن عیاللر صورتی نینگ رای کارتیگه کیرتیلمسلیگینی تاکیدله دی.

افغانستان نینگ بیرقنچه ولایت لریده امنیت یمان لیگی اهالی نینگ پارلمانی سیلاولریگه اشتراک قیلیشلری اوچون توسقینلیک یره تیشی ایتیلیب کیلماقده.

مستقل سیلاولر کمیسیونی امنیت توله تامین لنمه گن حدودلرده رای صندوقلرینی قوییلمس لیگینی ایتدی.

اوشبو کمیسیون مسوللریگه کوره افغانستان بویلب 6835 مینگ رای مرکزلرینی اچیلیشی اینابتگه آلنیب اوشبو مرکزلر خوف سیزلیگینی تامین لش ،امنیتی کوچلرگه وظیفه بیریلگن.

اولرگه کور هر بیر مرکزنینگ امنیتی تامین بولیشی خصوصیده ایشانچ بیلدریلسه اوشبو مرکزلرده رای صندوق لری قوییله دی.

رسمی معلومات لرگه کوره، پارلمانی سیلاو آلدی ترغیبات لری، کیله جک سرطان آی نینگ ایککینچی سیده یولگه قوییلیب سنبله آی نینگ 25 سیگه چه دوام ایتیشی ریجه لنگن.

عینی حالده، افغانستان سیلاو لرکمیسیونی تمانیدن تشکیل ایتیلگن شکایت لر کمیسیونی سوزچیسی سیلاو لر ده قتنشیش اوچون رویخطدن اوتگن 2500 دن آرتیق کیشی دن 83 کیشی قورال لی گروه لر بیلن علاقه سی بارلیکده عیبلنگن لیگینی ایتگن.

اوشبو مسله یوزه سیدن تیکشیریشلرنی "ویتینگ" ناملی کمیسیون آلیب باریشی و نتیجه لرنی شکایت لر کمیسیونیگه پنجشنبه کونی نینگ سونگی گه قدر تاپشیریش لری کیرک بولگنی ایتگن.

لیکن مستقل سیلاولر کمیسیونی اوشبو نتیجه لر نی جمعه کونی نینگ سونگیگه قدر هم شکایت لر کمیسیونی گه تاپشیر مه گنلیگینی ایتگن.