پلیس جنرالی اون ییل قماق جزاسیگه محکوم بولدی

مخدره ماده لرقاچاقیگه قولی بارلیگی ده عیبلنیب توتقینگه الینگن پلیس کوچلرنینگ یوقاری مرتبه لی خادملریدن بیری اون ییل قماق جزاسیگه محکوم ایتیلدی.

افغانستان ده گی مخدر ماده لرگه قرشی کوره شیش مخصوص محکمه سی اون ییل تنفیذی قماق جزاسیگه محکوم ایتیلگن پولیس ضابطی نی نقدی پول توله شگه هم مجبور ایکنینی تاکیدله دی.

حکم لرگه کوره محکوم ایتیلگن جنرال ملهم اوشبو محکمه قرارگه موافق بولمه گن حالده اوز دعواسینی ایککینچی محکمه گه ایلگری سورش حقیگه ایگه.

مخدره ماده لرگه قرشی کوره شیش مخصوص عدلی اداره سی ، کیچه پلیس نینگ تورتینچی زون قوماندانی جنرال ملهم نی آچیق بیر شکلده محکمه گه تارتیب ، محکمه نتیجه سینی بوکون اعلان قیلدی.

جنرال ملهم جنابلری ، بوندن ایکی آی آلدین مخدره ماده لر قاچاقچیلری نی یاردم ایتیش عیب بیلن ایچکی ایشلر وزیرلیگی تمانیدن حبسگه آلنگندی.

دولت نینگ یوقاری مرتبه لی خادمی صفتیده وظیفه آلیب بارگن جنرال ملهم نینگ، مخدره ماده قاچاقچیلری بیلن یاردم بیریش اوچون محکمه گه تارتیلیشی ، بیرینچی بار کوزه تیلماقده.

پلیس نینگ تورتینچی زونی ، سرحدی لوا سی نینگ اسکی قوماندانی،جنرال ملهم ،محکمه نینگ نهایی قراری اعلان بولیشی آرتیدن سوز گه چیقیب ،گناه سیزبولگنینی تاکید لب،اونگه قرشی قوییلگن محکمه نی بیردسیسه ایکنینی ایتگن.

آلتمش بیر یاشیده بولگن جنرال ملهم گه کوره، 40 ییل دن بویان افغانستان تینچلیگی اوچون خذمت قیلیب کیلگن بیراق محکمه جنرال ملهم نینگ مخدره ماده لر قاچاقچیلری گه یاردم قیلیشی واوز صلاحیتلریدن سواستفاده قیلگنی طفیلی اونی قماق جزا سیگه محکوم قیلگن.

محکمه حکمی محمد امان سنگری نینگ ایتیشیچه ،جنرال ملهم جنابلری محکمه نتیجه سی نی قبول قیلمه سه ، استیناف محکمه سیگه مراجعت قیله آله دی.

افغان رسمیلری اوتگن بیرنیچه ییلدن بویان مخدره ماده لر قاچاقینی آلدینی آلیش اوچون جدی اعتبار قره تییب کیله یاتگنینی تاکید لیدی لر.

بیراق مخدره ماده لر قاچاقیگه قولی بار دیب ادعا ایتیلگن دولت نینگ یوقاری مرتبه لی خادملرینی حبسگه آلنیب محکمه گه تارتیلمگنی خلق نینگ جدی تنقیدلریگه سبب بولیب کیلگن.