غزنی ولایتیده یوزبیرگن انتحاری هجوم تلفاتی

افغانستان ایچکی ایشلروزیرلیگی چیقارگن بیاناتیده، غزنی ولایتی نینگ اورین باسری محمد کاظم الله یار و اونگه قوشیمچه تورت کیشی غزنی ولایتی نینگ مرکزیده یوزبیرگن انتحاری هجوم عاقبتیده هلاک بولگنینی معلوم قیلگن.

الله یار جنابلری نینگ اوغلی گه کوره غزنی ولایتی اورین باسری نینگ قوریقچیسی همده اونگه یقین بولگن ایککی کیشی هم اوشبو پارتلش عاقبتیده هلاک بولگن.

پلیس خادملری نینگ ایتیشلریچه انتحارچی کیشی غزنی ولایتی نینگ ولایت حاکمی اورین باسری، اویدن ایش گه کیته یاتگن پیتیده اونینگ موترینی هجوم گه آلگن. غزنی ولایتی نینگ محلی مقاملریگه کوره پارتلاوچی ماده لری بولگن شخص حاکم و اونینگ یولداشلری کیته یاتگن ایککی موتر نینگ بیریسی یانیده اوزینی پارتلتگن.

اوشبو پارتلش نینگ انچه کوچلی بولگنی اورغولنگن.

محمد کاظم الله یار بیرنیچه ییلدن بویان غزنی ولایتی نینگ اورین باسری صفتیده ایش قیلیب کیلگن و بوندن قریب ایککی آی آلدین هم اونگه قرشی اویشتریلگن سوی قصد دن جانی امان قالگن ایدی.

غزنی ولایتی افغانستان نینگ ناتینچ منطقه لریدن حسابلنیب طالبلرنینگ اساسی مرکزلریدن بیری دیه کورسه تیلماقده.

حاضرگی پیتگه چه اوشبو انتحاری هجومنی هیچ بیر گروه اوز بوینگه آلمه گن، لیکن بوندی پارتلش هجوملری هردایم طالبلر گه نسبت بیریلیب کیلماقده.

افغانستان پلیسی اوشبو هجوم یوزه سیدن تیکشرو ایشلرنینگ یولگه قویگنیدن خبربیره دی، اما بوندن آلدین هم یوزبیرگن شونگه اوخشش حادثه لر بوییچه آلیب باریلگن تیکشرولر نتیجه سی حقیده آرتیق معلومات بیرمیدیلر.