غزنی ولایتی سیلاولری نینگ نهایی نتیجه سی اعلام بولدی

Image caption پارلمانی سیلاولری نینگ جریانی کوپ گینه قره مه قرشیلیک لر بیلن یوزمه یوز بولیب کیلگن

افغانستان مستقل سیلاولر کمیسیونی ، غزنی ولایتی نینگ نهایی نتیجه سی نی هم اعلام قیلدی. غزنی ولایتی پارلمان سیلاولری نینگ نهایی نتیجه سیده هیچ قنده ی اوزگریش کیلمه گن. بوندن بیر هفته آلدین سیلاولر کمیسیونی غزنی دن تشقری ، بوتون ولایت لرنینگ نهایی نتیجه سی نی اعلام قیلگن ایدی. غزنی ولایتی ده گی یوتوق گه ایریش گن بوتون نامزد وکیل لری ، هزاره قومی دن دیر. غزنی ولایتی نینگ نهایی نتیجه سی بیر هفته کیین گه توشگن سببی نی مستقل سیلاولر کمیسیونی ، بیر قنچه تخنیکی قیین چیلک لرنینگ موجود لیگی دیب ایتگن ایدی. مستقل سیلاولر کمیسیونی اوتکزگن مطبوعات انجمنیده ، اوشبو کمیسیون ، بولیب اوتگن پارلمان سیلاولر جریانی نینگ قانون اساسیده ایلگری ایلتگنینی ادعا قیلیب ، غزنی ولایتیده گی نهایی نتیجه سیده هیچ قنده ی اوزگریش کیلمه گنی نی ایتدی. بوندن آلدین راق افغانستان جمهور رییسی حامد کرزی ، غزنی ولایتیده گی نتیجه سیده ملی وحدت نظر گه آلینیشی کیره ک لیگی نی ایتگن ایدی اما بو حالتده قرگنده ، افغانستان جمهور لیک ریاستی سرای نینگ مطبوعات مصلحت چیسی رفیع فردوس ، غزنی ولایتی نینگ نهایی نتیجه سیده اوزگریش کیلمه گنی نی قانون اساسیده ، سیلاولر کمیسیونی نینگ صلاحیت لریدن دیب ایتدی. شونده قرمه قرشی فکر لر یوزه گه چیقیشی بیلن مستقل سیلاولر کمیسیونی نینگ ریسی فضل احمد معنوی نهایی پارلمان سیلاولری نینگ نتیجه سیده هیچ قندی اوزگریش کیلمه یشی اوستیگه تاکید قیلگن. باشقه تماندن ایسه موفق بولمه گن نامزدلر یولگه قویب کیله یاتگن ناراضلیک نمایشلریده قلاب کارلیک لرنی کینگ کولمده یوزبیرگنینی ادعا قیلیب پارلمان سیلاولری نینگ قیته بولیب اوتیشینی طلب قیلماقده لر. افغانستان مستقل سیلاولر کمیسیونی پارلمان سیلاولری نینگ نهایی نتیجه سی اساسیده موفق تانیلگن کیشی لرگه اعتبارنامه ترقه تیش دستوری نینگ یولگه قویب شوبیلن بیرگه اوشبو نامزدلرنینگ کیله جک پارلمان وکیللری دیب رسما تانیشترگن. اوشبو کمیسیون باشلیغی فضل احمد معنوی گه کوره ، حاضر گه قدر ، یوتوق گه یریشگن نامزد وکیل لرنینگ یریمی دن کوپراقی ، اعتبار نامه قولگه کیلتیرگن لر.