خلق: طوی قانونی توزه لیشی بیلن کمبغللیک آلدی آلینه دی

Image copyright Getty
Image caption افغانستانده طوی کویلگ لری ، طلا ، قلین ، اوی اسباب اسکونه لری شونگه اوخشه گن باشقه نیرسه لر نینگ ساتیب آلیشی هم کیه و بویینیگه دیر .

افغانستان عدلیه وزیرلیگی تمانیدن ، طوی مراسمی قنده ی یولگه قوییلیشی و مذکور طویلرده قنچه پول صرف لنیشی خصوصیده ینگی قانون لایحه سی توزه لیشی بیلن ، مملکت بیر قنچه اهالی سی خرسند لیک بیلدیریب باشقه لری ایسه ایریم نظر بیرگن لر.

اوشبو وزیرلیک نینگ معلوم قیلیشیچه ، اوشبو قانون اساسیده ، خاتین لر و ایرکک لر بیر سالونده بولمس لیگی شو نینگ دیک طوی مراسمی ده کوپ پول صرفلنیشی نینگ آلدینی آلیش اوچون مهمان لر آز راق دعوت بوله دی.

اورته حال بیر عایله تمانیدن افغانستان نینگ ایریم منطقه لریده اینیقسه کابل شهریده یولگه قوییله یاتگن طوی مراسم لریده یوزلب کیشی قتنه شه دیلر. اوشبو کیشی لرگه آش ترقه تیشی هم قریب اون مینگ امریکا لیک دالر هزینه تارته دی.

مینگلب دالر یککه طوی مراسمی نینگ یولگه قوییش اوچون صرفلنمه یدی بلکه بوندن تشقری باشقه مراسم لر ، مثلاً شیرینی خورلیک ، تخت جمعی و باشقه عنعنوی مراسم لر هم بار کیم کوپ گینه هزینه کوته ره دی.

اوشبو هزینه لر نینگ صرفلنیشی مملکت بوییچه ، عنعنه لر بیلن حمایت بولیب کیلگن.

اما عدلیه وزیرلیگی تمانیدن زود لیک بیلن طوی مراسمی قنده ی یولگه قوییلیشی شونینگ دیک اوشبو طوی لر هزینه لری قنچه لیگی و باشقه مسئله لر اوچون چیقریلیشی کوتیله یاتگن قانون خصوصیده ، بیر قنچه یاش لر ایریم نظر لری بار.

اوشبو یاش لر نینگ بیرقنچه سی مذکور قانون توزه لیب عملی بولیشینی یخشی دیدیلر لیکن بیر قنچه سی ایسه مذکور قانون تطبیق بولمس لیگیگه تاکید قیله دیلر.

عین زمانده بیر قنچه باشقه کیشی لر هم طوی مراسمی شخصی بیر مسئله بولگنینی اوستیگه تاکید قیلیب ، دولت تمانیدن بو خصوصده اره لشیش نی ناتوغری دیب ایته دیلر.

اولر نینگ معلوم قیلیشیچه ، بو مسئله قانون بیلن تطبیق بولیشی ممکن ایمس بلکه طبیعی بیر حالده دولت ، تبلیغ قیلیشی عین حالده موجود عنعنه لرنینگ یمان تمانی نی خلق گه آیدین قیلیشی کیره ک.

بو حالتده قرگنده ، سرپل لیک یاش جمشید گه کوره ، دولت مذکور قانون نینگ چیقرمس دن آلدین ، تطبیق قیلیش یوللری نی تاپیپ نا پسند عنعنه لرنینگ آلدینی آلیشگه حرکت قیلیشی لازم.

شونده ی بیرحالده افغانستان ملی کینگاشی نینگ اعضا لریدن خانم آصفه شاداب ، عدلیه وزیرلیگی تمانیدن طوی قانونی خصوصیده ایجاد ایتیلگن مصوبه دن طرفدار لیک بیلدیریب بو مسئله عملی بولیشی بیر یاقدن ، کوپ گینه مصرف لر نینگ آلدینی آلیشی گه یاردم بیره دی باشقه تماندن کمبغل لیک نی خلق اره سیده اورته دن ایلته دیب معلوم قیلدی.

افغانستان ده اگر کم بغل لرگه خاتین آلیش اوچون مذکور قانون کبی قوله یلیک یره تیلسه ، اولر هم خاتین اوستیگه خاتین آلیشه مه دیلر دیگن سوراققه ، خانم شاداب ، قرشی لیک بیلدیریب ، بو مسئله ، مذکور قانون تصویب بولمس دن آلدین پارلمان تمانیدن جدی شکلده تیکشیریله دی دیب ایتدی.

عین زمانده افغانستان عالم لر کینگاشی عدلیه وزیرلیگی تمانیدن مصوبه سی توزه لگن طوی قانونی دن دن حمایت بیلدیرگن .

باشقه تماندن ، پارلمان اعضالری هم بو مسئله اوچون ایریم فکر و ملاحظه لری بار.

ملت وکیل لر نینگ بیرقنچه سیگه کوره ، مذکور قانون بیر قنچه تعدیل لر بیلن تصویب بولیشی ممکن.

افغانستانده اینیقسه پایتخت کابلده یولگه قوییله یاتگن طوی لر کیچه کیچ قرونگه چه دوام قیلیب هر دایم عایله لرگه باغلیق بیر مسئله دیب کورسه تیلگن.

شونینگ دیک بیر قنچه افغانستانلیک لرگه کوره ، دولت ، بو مسئله گه کوز قره تیشی دن آلدین ، باشقه مهم ایش لریگه عمل قیلیشی کیره ک.