نیچه ولایتده گی هجوملرده تلفات لر موجود

Image caption قندهار ولایتی نینگ داکتر لری یرله نگن لر نینگ نیچه کیشی سی یمان وضعیتده بولگنینی معلوم قیلگن لر.

بوگون افغانستان نینگ ایریم ولایت لریده طالبان گروهی تمانیدن ایریم عصانچیلیک هجوم لر یولگه قوییلدی.

قندهار ولایتیده بیر بامب پارتله یشی عاقبتیده ، اون بیش کیشی عادی اهالی هلاک بولگن.

شونینگ دیک خوست ولایتی نینگ پولیس قوماندان لریدن بیری بیلن قوشیمچه، ایککی پولیس بیر انتحاری هجوم نتیجه سیده هلاک بولگن.

خبر لرگه کوره، غزنی و لغمان ولایت لریده هم نیچه پارتله ش یوز بیرگنی باعث نیچه کیشی نینگ هلاکتده اوچره تگن.

قندهار ولایتی نینگ ارغنداب و خاک ریز اولوسوال لیک لری آره سیده اورنه تیلگن بیر ماین پارتله یشی عاقبتیده اون بیش عادی اهالی هلاک بولگن.

اوشبو ولایت خوف سیزلیک آمری شیر شاه یوسف زی گه کوره، ساعت اون ییرته لب عادی اهالی بیر تونس موترده کیته یاتگن بیر پیتده ، اورنه تیلگن ماین بیلن تصادم قیلیب نتیجه ده 8 میده باله ، بیش عیال ، و اوچ کیشی باشقه هم هلاک بولگنلر .

شو نینگ دیک بوگون یرته لب ساعت 7 یریم ده خوست ولایتی واکنش سریع پولیس قوماندانی محمد ظاهر بیلن قوشیمچه ایککی پولیس مأموری بیر خود کش هچوم نتیجه سیده هلاک بولیب 23 کیشی هم یره لنگن.

یره لنگن لر 8 پولیس مأموری و اون بیش عادی اهالی دن عبارت.

اوشبو هجوم مسوولیتی نی طالبان گروهی اوز بویینی گه آلیب ، خوست ولایتی نینگ واکنش سریع پولیس قوماندانی دن تشقری، نیچه تشقی و ایچکی کوچلر هم مذکور هجوم ده هلاک بولگنینی ادعا قیلگن لر.

طالبان گروهی نینگ سوزچیلریدن ذبیح الله مجاهد، رسانه لر بیلن بولگن صحبتیده، اوشبو هجوم پکتیالیک گل حمید دیگن بیر انتحارچی شخص ، حربی کییمی دن فایده لب خوست ولایتی نینگ واکنش سریع مرکزیده اوزینی پارتله تگنینی معلوم قیلگن.

غزنی ولایتیده هم بوگون بیر خود کش هجوم یولگه قوییلیب نتیجه ده ، بیر میده باله اولیب باشقه ایککی باله ایسه یره لنگن. یره لنگن لر نینگ وضعیتی یمان ایتیلگن.

بیرخودکش هجومچی تمانیدن آیسکریم ساتیلوچی کراچی سیده پارتله ش ماده لر اورنه تیلیب ، غزنی ولایتی نینگ امیر محمد خان قلعه سی دیگن بیر منطقه ده مذکور ماده لر پارتله تیلگن.

اوشبو منطقه کابل-قندهار شاه یولیده موجود.

غزنی ولایتی نینگ مقام لریگه کوره، حاضر گه قدر مذکور هجوم قه یسی مقصد بیلن یولگه قوییلگنی انیقلنمه گن لیکن پولیس تمانیدن تیکشیریش ایشی باشله نگن.

شو نینگ دیک توناون آقشام لغمان ولایتی نینگ مرکزی مهتر لام شهریده ایککی پارتله ش یوز بیریب نتیجه ده ایککی پولیس هلاک بولیب و 9 کیشی هم یره لنگن.

لغمان پولیس مقام لریگه کوره، بیرینچی پارتله ش هیچ کیمگه زیان یتکیزمه گن لیکن پولیس کوچلری محل ده کیلیش لری بیلن ایککینچی پارتله ش یوز بیریب اوزی دن تلفات قالدیرگن.

لغمان ولایتی نینگ ساغلیک نی سقله ش مسوولری ایسه یره لنگن لرنینگ نیچه کیشی سی یمان وضعیتی بولگنی نی معلوم قیلگن لر.

سونگی پیتلرده، طالبان گروهی نینگ بدر ناملی عملیات لری ، افغانستان نینگ ایریم منطقه لریده دوام تارتیشی نتیجه سیده، مملکت نیچه خوف سیزلیک مقام لری بیلن قوشیمچه ، یوزلب عادی اهالی هم هلاک و یره دار بولگن.

هرچند افغانستان دولتی تمانیدن قوراللی مخالف گروه لر بیلن مذاکره قیلیش زمینه سی یره تیلگن بولسه هم لیکن طالبان گروهی انیق بیر شکلده اوشبو مذاکره لر یولگه قوییلمه سلیگیگه تاکید قیلیب ، اوز هجوم لری نی افغانستان بویلیب کینگه یتیرگن لر.