فاریاب ولایتیده توقنه شوو دوام ایتماقده

فاریاب ولایتی نینگ پشتون کوت ولسواللیگده افغان امنیتی کوچلری و عصیانچیلر آره سیده یوزبیریب کیله یاتگن اوریشده کمیده بیر ملی اردوی عسکری اولیب و بیر پلیس یره لنگن.

افغان کوچلرینی نینگ معلوم قیلیشلریچه اوشبو تومننی آق دره دیب اتلگن منطقه سیده کی عصیانچیلرنی یوق ایتیش اوچون خارجی وافغان کوچلری تمانیدن قوشمه حربی عملیات یولگه قویلگن.

فاریاب رسمیلری، حاضرگه قدر هم اوریش نینگ دوام تارتیب کیله یاتگنینی اورغولب لیکن، طالبان عصیانچیلری نینگ تلفاتی حقیده هیچ قندی معلومات بیرمه گن.

بوندن ایککی کون آلدین یولگه قویلگن اوشبو عملیات ده رسمیلرگه کوره بیرقنچه حدودلر طالبلردن تازه لنگن.

شمالی فاریاب ولایتی نینگ ایریم تومنلریده طالبان عصیانچیلری نینگ انچه فعال بولگنی ایتیلماقده.

افغان وچیت ایللیک کوچلری اوتگن بیرنیچه هفته جریانیده بو ولایت نینگ پشتون کوت، دولت آباد تومنلریده حربی عملیات لرنی یولگه قوییب کیلماقده.

بوندن بیرنیچه کون الدین قیزل ای تشکیلاتی اوشبو حدودلرده یوزبیریب کیله یاتگن اوریشلر باعث قریب اون بیش مینگ انسان اوز اوی جایلرینی ترک ایتیشگه مجبور بولگنینی ایتگندی.

سونگی پیتلرده نه فقط فاریاب بلکه افغانستان نینگ شمالی وشمال شرقی حدودلرده طالبان عصیانچیلری نینگ فعال بولگنی ایتلماقده.