اولوسی جرگه، عالی محکمه نینگ آلتی اعضاسی نی صلاحیت سیز اعلام قیلدی

Image copyright Getty

افغانستان اولوسی جرگه سی، مملکت عالی محکمه رییسی و مذکور محکمه بیش اعضا سینی صلاحیت سیز اعلام قیلدی.

پارلمان سیلاولری نینگ تیکشیروچی مخصوص محکمه، اولوسی جرگه ده گی 61 نماینده نینگ قلاب کارلیکده عیبدار اعلام قیلگنی دن ایککی کون کیین، مملکت عالی محکمه رییسی و اعضالرینی صلاحیت سیز اعلام قیلگن.

شونده ی بیرحالده، عالی محکمه ایسه، اولوسی جرگه اولرنی صلاحیت سیز قیلیش حقیگه ایگه ایمس لیگی نی ایتگن.

شو نینگ دیک اولوسی جرگه ده گی نماینده لر، ایککی کون آلدین مملکت باش قاره لاوچی سی نینگ هم صلاحیت سیز اعلام قیلگن ایدی.

اولوسی جرگه نینگ بوگونکی جلسه سی اساساً پارلمان سیلاولری نینگ تیکشیروچی مخصوص محکمه نینگ سونگی قراری توغری سیده بخشلنگن ایدی.

اوشبو جرگه اعضا لری، سیلاولر نهایی نتیجه سی نی تیکشیریش مقصدیده مخصوص محکمه، مملکت عالی محکمه سی تمانیدن ایجاد ایتیلیشی نی، افغانستان باش قانونی گه بناً قرشی بیر عمل دیشیب، مذکور محکمه رییسی بیلن قوشیمچه بیش اعضا سینی ، صلاحیت سیز قیلیشیده، رأی بیردیلر.

اولوسی جرگه رییسی عبدالرووف ابراهیمی اوشبو جرگه اعضا لری نینگ بوخصوصده گی قرارینی بونده ی اعلام قیلدی.

صدا.......

"عالی محکمه تمانیدن، وظیفه وی جرم یولگه قویلگنی ، قانون سیز لیک بیر شکلده مخصوص محکمه ایجاد ایتیلگنی، اولوسی جرگه نینگ اعتبار سیزلیگیگه سعی بولگنی، شو نینگ دیک بحران یره تیلگنی و مملکت باش قانونی بیلن قوشیمچه سیلاولر قانونی ایاق آستی بولگنی استنادی بیلن، مملکت عالی محکمه رییسی جناب پوهاند عظیمی، بیلن قوشیمچه، باشقه بیش اعضاسی، صلاحیت سیز بولیب، عدلی و قضایی تعقیبیده کیریش اوچون مخصوص بیرمحکمه ده تانیشتریلسین لر."

اولوسی جرگه تمانیدن بوگون آلینگن تصمیم نی مملکت عالی محکمه سی رد ایتگن. اوشبو محکمه مقام لریدن، صدیق الله کامه وال، اولوسی جرگه، عالی محکمه رییسی و اعضالرینی صلاحیت سیز قیلیش حقیگه ایگه ایمس لیگی نی ایتگن.

سیلاولر قلاب کارلیگی نینگ تیکشیروچی مخصوص محکمه سونگی قراری نی اعلام ایتیشی، اولوسی جرگه اعضا لری بیلن قوشیمچه بیر قطار سیاسی حزب لرنینگ جدی تنقید لری بیلن یوزمه یوز بولگن.

شو نینگ دیک اولوسی جرگه نینگ 200 اعضا سی قانون دن حمایت ایتیش ناملی بیر سیاسی ائتلاف تشکیل بیریب، مخصوص محکمه نینگ بیکار قیلیشی نی جمهور رییس کرزی دن جدی شکلده طلب قیلگن.

اوشبو ائتلاف گه کوره، اگرده ملت وکیللر نینگ، طلب لری جمهور رییس کرزی تمانیدن عملگه آشیریلمسه، اولرمملکت بویله ب، نمایش لر اوتکزیش لری بیلن آگاه لنتیرگن لر.

مخصوص محکمه قراری اعلام بولیشی دن حاضرگه قدر، افغانستان جمهور رییسی، و بیرلشگن ملت لر تشکیلاتی، هیچ قنده ی مناسبت بیلدیرمه گن لر. لیکن امریکا قوشمه ایالت لری نینگ افغانستانده گی ایلچی سی کارل آیکن بیری، ایسه، مخصوص محکمه تمانیدن اولوسی جرگه نینگ 61 اعضا سی اورنیده باشقه کیشی لر کیریش مسئله سی، افغانستان و دنیا اوچون اوته مهم بیر موضوع دیب بهاله گن.

"مخصوص محکمه تمانیدن اعلام ایتیلگن موضوع، تعبیر و تفسیر بولیشگه ضرورتی بار. و حاضر گه چه قنده ی تعبیر بولیشی هم بیللی بولمه گن. و بو توغریده امریکا قوشمه ایالت لری ایستگی بو دیر کیم، هر قنده ی تصمیم آلیش، افغانستان اساسی قانونیگه ماس بولیشی شرط. اوشبو تصمیم کیله سی سیلاولرده هم بیر یخشی اساس قورسین. شونده ی بیر حالده که بیز مسوولیت لرنی افغانلرگه تاپشیریش ریجه سی اوستیگه ایشله ماقده میز، بو مسلئه نی افغانستان خلقی و حکومتی حل ایتیشی کیره ک دیب ایتدی امریکا نینگ کابلده گی ایلچیسی کارل آیکن بیری."

افغانستان نینگ هر اوچله قوه سی آره سیده، نیچه آی دن بیری قره مه قرشی لیک لر یوزه گه چیقیشی، خلق نینگ خواطرلرینی کوپه یشیده سبب بولگن.

شو نینگ دیک 61 ینگی کیشی، اولوسی جرگه اعضا لری قطاریده کیریشی قنده ی صورت تاپیشی هم بیللی ایمس.

بیر قطار تحلیل چیلر نینگ معلوم قیلیش لریچه، افغانستان حاضر گی شرایطده، هر تمانلمه بحران بیلن دوچ کیلگن.

اولرگه کوره، عالی محکمه رییسی و بیش اعضاسی بیلن قوشیمچه، 7 نامزد وزیرلر اعتماد آوازی قولگه کیلتیریش اوچون اولوسی جرگه ده تانیشتیریمله گن بیر حالده، مخصوص محکمه، اوشبو جرگه 61 اعضا سی نینگ صلاحیت سیزلیگینی قرار آلگن.