طالبان: ملا محمد عمر اولمه گن.

طالبان سوزچیسی اوشبو گروه رهبری ملا محمد عمر نینگ اولگننی رد ایتیب، تیلبفون رقم لری و ایمیل ادرس لری هک بولگنینی معلوم قیلدی.

بوگون ایرته لب طالبان سوزچیلریدن بیری ملامحمد عمرنینگ اولیمینی ناتوغری دیب، اونی اولیمی باره سیده طالبان سوزچیلری نینگ قول تیلفونیدن مطبوعات گه یوباریلگن پیامنی حقیقتی یوق لیگینی تاکیدله گن.

بوندن الدین ایریم رسانه لر طالبان سوزچیسی تیلفونیدن کیلگن پیام گه اساس لنیب ملامحمد عمرنینگ اولگنی باره سیده خبرترقه تگندی.

طالبان نینگ رسمی اعلامیه سی دیب یوباریلگن پیامده ملامحمدعمر یوره ک کسللیگی باعث دنیادن اوتگنی خبربیریلگندی.

بو خبر ترقه لیشی طالبان نینگ سوزچیلردن بیری بی بی سی بیلن بولگن صحبتیده قول تیلفون لری و انترنیت صحیفه لری ، هک بولگنینی ادعا قیلدی. اونی ایتشچه " دشمن و جاسوس لیک خادملری انترنیت صحیفه میز و تیلفونلری میزنی هک قیلیب انه شو ارقه لی همه گه پیام یوبارگنلر."

طالبان سوزچیسی گه کوره، آنه شو سبب اولر انترنیت صحیفه لرینی وقتینچه لیک باغله گنلر.

طالبان آدرسیدن پشتو، انگلیسی وعرب تیللریگه یوباریلگن پیامده ملامحمد عمر اولدی، ملاعمر یقینلریدن "گل آغا" ناملی شخص اونی اورنیده تعین ایتیلدی دیب خبربیریلگندی.

تیلفون ارقه لی یوباریلگن پیام ده گل آغا دیگن شخص طالبان گروهی نینگ سابق مالی مسوولی دیه ناملنگن.

طالبان سوزچیسینی بی بی سی گه ایتیشچه ملامحمد عمر نینگ ساغلام احوالی یخشی بولیب، حاضرگه قره گنده افغانستانده حیات اوتکزماقده.

سونگی ییلرده طالبان گروهی نینگ رهبری ملامحمد عمرنینگ قییرده وقندی احوالده بولگنی باره سیده انیق معلومات یوق. بیراق افغانستان استخبارات مسووللری اونینگ پاکستانده حیات اوتکزیب کیله یاتگنینی ادعا قیلیب کیلماقده.