هربیر تیل نینگ رواجی گه خبر واسطه لرینی رولی کتته

تيل هربيرملت نينگ باشقه ملت لردن اجره ته ديگن بيرعنصرحسابلنه دي شوبيلن قيسي ايلت گه تعلقلي ليگي تانيله دي .انسانلرنينگ اوزبويروق وايستگ – طلب لري ايسه تيل واسطه سيده بير- بيرلريگه افاده لنه دي.

اونگه قره ب ايش لرعملگه آشه دي . ييريوزيده حيات كيچيره ياتگن قريب 7ميلياردانسان هم يوزلب فرقلي تيللرگه ايگه بوليب اوشبوتيللربيلن اوزارا صحبت له شيب كيلماقده لر.انه شو جهت دن هم هربيرملت اوزيگه خاص تيل ومدنيت گه ايگه بوليب واونينگ رواجلنتيريش وسقلب- اويلش اوچون بورچلي دير.هربيرخلق بومقصدگه ايريشيش اوچون اولگوره دي . تاريخ دواميده بويوك امپراتوروسلاله لرنينگ آره لريده يوزبيرگن قانلي ودهشتلي اوروش لرويوريش لروشوجريانده دنيا نينگ بعضي قسملري قولمه قول بوليشي وعصرلراستيلا ده قاليشي وينگي مملكت لرخريطه لري يابيرتامان باسيمي بيلن يا اوزقوزغلانلري ويارضايت لري بيلن شكلله نيشي وملت لرآره لريده نفاق وتعصب لرتاپيليشي وحاكم بولگن قوم لراوزتيل لريني رواجلنتيريش اوچون باشقه تيللرگه كم مهرليك و يامان مناسبت كورسه تيش لري ايسه اونلب تيللرنينگ نابودليك وحتي يوقه ليش وضعيتي گه چه آليب كيليشي گه سبب بولدي.

افغانستان مملكتي ده قديم دن بيري تورغون يشب كيلگن بيرقنچه ايلت لربوجمله دن توركي تيللرده سوزلشه ديگن ايلت لرتيلي هم اوتميشده شكللنگن سياسي توزوم لرقرشي وضديت لري سببلي قتيق ضربه كوريب حتي نابود ليك حالتده ييتيشگن ليگي هيچ كيم گه سربوليب قالمه گن . اما اوشبو خلق منه شوبيرعصردواميده اوزتيلي ني اونوتمي رسمي تيل بوليش اوچون كوره شچن ليك قيلگن جان فدافراستلي عالمدن اوتگن وحياتده بولگن شخص لر كوره شيش لري ايسه نتيجه سيز قالمي بلكه بيرنيچه اون ييل آقيميده نتيجه بيره باشله دي ونهايتده رسمي تيل صفتيده تانيليب اساسي قانونده قيد ايتيلدي .

اگراساسي قانونني حسابگه آلگن حالده تيل رواجله نيشيگه دولت بورچلي بوليب ودولت آرقه لي هربيرساحه ده امكانيت لر يره تيليشي وتيل نينگ رواجله نيب يوكسليشي گه عامه وي خبرواسطه لري رولي كته ايكن ليگي تاكيدلنه دي هرچند اوشبوتيل رواجله نيشي اوچون ايجابي قدم لركوتاريليب، بونينگ رواجله نيشي گه هيچ قنده ي چيكلاوبولمسه هم اخيرگي ييللرده دولت تاماندن اينيقسه اوزاختياريده باررسانه لرده اوشبوتيل رواجله نيشي اوچون كوزگه كورينرلي اعتبارقره تيلمه گني توركي خلقلربوجمله دن اوزبيك خلقي تاماندن قتيق تنقيدلربيلن بيرگه بوليب كيلماقده. فارياب ليك ضيالي لردن داكترطاهرفاريابي گه كوره حامد كرزي حكومتي يوزه كيليشي بيلن اوزبيك اولوسي اوزتيلميزرسمي بولدي دولت اوزامكانيت لريني اوشبوتيل اختياريگه قوييب رواجله نيشگه امكان تاپدي ديب اويله گن ايديلراما تيل رواجله نيشي فقط قاغذيوزيگه قاليب خلق نينگ آرزولري رويابگه چيقمي بلكه اميدسيزبولگن لرديدي .

شونينگ ديك طالبلرحكومتيدن دن تشقري اوتگن توزوم لردوريده بيرنيچه ييل فارياب ملي راديو تلويزيونيده نشرات مسوولي مديري بوليب ايشله گن استادحميدالله بوتون حيدري گه كوره آلدينگي حكومت لرتاماندن اوزاختيارلريده بولگن راديو،تلويزيون ونشريه لريده وقتي آزراق بولسه هم اوزبيك تيليده منتظم روشده تورلي خيل برنامه لرترقتيلرايدي حاضرگي حكومت دن كوره كوپراق اعتبار بيريلرايدي ديب ايته دي بوتون جنابلري .

شوكبي انجنيرامين الله انتظارنينگ ايتيشيچه اساسي قانون گه اعتباربيرگن حالده دولت بهانه قيلمسدن اوشبوتيلني رواجي اوچون هم باشقه يوللرآرقه لي وهم اوزعاموي خبرواسطه لري آرقه لي اورين بيريب رواجلنتريشي كيره ك.

عين حالده ايريم لرگه كوره اوشبوولايت ده فعاليت قيليب كيله ياتگن فارياب هفته ليك دولتي جريده صحيفه لري نينگ كوپ قسمي اوزبيك تيلي ده بولگن ليگي اورنيده حتي هيچ بير موضوع هم بيرنيچه سانيده نشرايتيلمه ياتگني تنقيدلربيلن بيرگه بوليب كيلماقده .

مين فارياب ولايتي ده گي مدنيت وخبرلررياستي باشليغي مناسبتي ني اورگه نيش اوچون ايكي مرته مذكوررياستگه مراجعه قيلديم. اوشبورياست باشليغي شاه رضا منشي زاده صحبت قيليشگه حاضربولمه دي. عين حالده فارياب ملي راديوتلويزيون باشليغي محمد افضل اميددولت چوكاتيده گي ملي راديوو تلويزيون نشراتي نينگ كوپراق برنامه لري اوزبيك تيليده بولگن ديب ايته دي . اونگه كوره ميمنه ده گي ملي تلويزيون امكانيت لري چيكلنگن ليگي اوچون بيركيچه وكوندوزده كابلده تيارلنگن 12ساعت ليك برنامه لرني آليب نشرايته ديلرفقط بيرساعتليك اجتماعي ،سياسي مدني وخبري موضوع لرمحلدن تيارلنه دي وكوپراق تيارلشده تخنيكي معما ومسلكي آدم لري آز شوكبي فارياب ملي راديوسي هم 24ساعتده 7ساعت يايين بيره ياتگني تاكيدلنه دي بوندن 50 فاييزي اوزبيك تيليده بولگن برنامه لرديب معلوم قيلينه دي .

فارياب ملي راديووتلويزيون مسؤولي محمد افضل اميدگه كوره اوشبو اداره تشكيلاتيده فقط بيرخبرنگاركيريتيلگن اينيقسه اوزبيك تيلي اوچون آيليك آله ديگن باشقه شخصني آليش امكاني يوق . يوقسه ايشگه آلشلريني ايته دي شونگه قره مسدن بيرقطارياشلرقيزيقيب تيكين شكلده شوبيرنيچه ساعت ليك برنامه لرني دولت چوكاتيده فعال بولگن عاموي خبرواسطه لريده تيارلب بوتوغريده خذمت كورسا تيب كيلماقده لر. اما همه هم اوزروزگاري وشخصي حياتي ايشلريني قوييب بو فدايي ليك ني قيله آلمه يدي.

فارياب عالي اوقوويورتي اوزبيك تيلي وادبياتي نينگ اوچينچي صنف طلبه لريدن سيد حسام الدين تويغون ايكي ييل دن بيري ميمنه شهريده فعاليت قيله ياتگن خصوصي راديو لردن بيريده برنامه لرتيارلب ايشلب كيلگن ايدي . او يقينده دولتي راديووتلويزيون گه اوزتيلي اوچون ايشلشگه قيزيقيب مراجعه قيلگن راديو مسؤوللري آيليك بيريشگه تشكيل لري يوقليگي ني ايتگن. اولر اوندن تيكين كيليب ايشلشيني سوره گن لرتويغون ايسه تيكين ايشلش روزگارلي وباله چقه لي بولگني اوچون قيين ديدي.

شوكبي ايريم لرنينگ فكريچه اوتميشلرده اوزبيك تيلي ني بيله ياتگن لرآدم لرآزبولسه هلي بومعما حل دييرلي بوليب ييترلي سانده اوشبوتيلني بيرتديرگن لركوپ ليگي كوزه تيله دي . اوزتيليگه قيزيقه ياتگن ياش لركوپ اما بوساحه ده مفت ايشلش هم علاجي يوقليگي ايتيله دي.

اوشبوولايتده گي دولت مسووللري اوتيمشده هم وحاضرهم راديووتلويزيون نينگ برنامه لري اوچون اهالي ياردم بيرمسليگي ني ايتيب كيلرايكن لراما بيرقطاراهالي گه كوره تشكيل بولمه گني وتيكين شكلده كيليب ايشلش هم همه گه قيين بوليشيگه قره مسدن دولت خادم لري اگرايستسه لر باشقه يوللردن هم اوزبيك تيليده برنامه لرنشرايتيش لري ممكن ديب تاكيدله يديلر

داكترجاويد قاضي زاده نينگ فكريچه حاضرده انترنت امكانيت لري رواجلنگن بيرخذمت بوليب اوزبيك تيليده ايسته گن موضوع لرموجود آليب گزيته لرده نشرايتيش ممكن ديدي . شونينگ ديك اونگه كوره اوزبيك تيليده اونلب عنوان كتاب لرچاپ ايتيلگن بولردن فايده له نيش ممكن عين حالده قوشني اوزبيكستان تيلي كاناللريدن ايسته گن موضوع لرني آليب ملي تلويزيون وملي راديو آرقه لي ياروتيش قيين بولمه گن .

اساسي قانونده دولت اوشبوتيلني رواجلنتيريشيني اوزعهده سيگه آلگن شوسببلي اوزرسانه لريده آيليك بيريب آدم لرني ايشگه آليشگه مجبورومسؤوليت لي ديب ايتيله دي.

شوكبي اوزتيلي ني سيوه ياتگن ايريم ياشلردولت چوكاتيده گي راديووتلويزيون بيره ياتگن نشراتي ايسه مسؤول لرتاماندن ايتيلگن فاييزايمس بلكه آز ديب اوني رد ايته ديلر.

اما خصوصي راديو وگزيته لردولتي راديوونشريه لرگه قره گنده نشراتي اوشبوتيلده كوپراق اجره تيلگن ليگي كوريله دي . انه شو راديولردن بيري هم تمنا ناملي ميمنه ده گي خصوصي راديولردن بيري دير.اوشبوخصوصي راديومسووللري گه كوره مذكورراديوآرقه لي تون وكون يعني 24ساعتده 17 ساعت نشرات بيريله دي. بوندن قريب يرمي اوزبيك تيليده بوليب سياسي ،اجتماعي مدني علمي وخبري موضوع لرني اوزايچيگه آلگن وكيله جكده استه – سيكين بوايتيلگن فاييزدن هم آشيريشلريني كوزله گن لر.

اوزبيك تيلي رسمي بولگن ليگيدن قريب اون ييل اوتسه هم حاضرگه قدراوشبوتيل اوچون بيرنيچه ييلدن بيري اوزولوك سيزيايين بيريب كيله ياتگن خلق ارا بي بي سي راديوسيدن تشقري اوشبوتيل اوچون مخصوص نه راديونه تلويزون قوريلگن ونه گزيته يعني نشريه بار.

بوايسه دايم اوزبيك اهالي سي اينيقسه اوزبيك ضيالي لريني تيل نينگ كيله جگي قنده ي بولرايكن تشويشي قيغولنتيريب كيلگن هرچند سونگي ييللرده مملكت بويلب ايجادايتيليب فعاليت يوريتيب كيله ياتگن بيرقنچه خصوصي ودولت اختياريده گي عاموي خبرواسطه لريده آزراق بولسه هم اوشبوتيلده اورين بيريليب تورلي موضوع لرترقه تيليب كيلينماقده ليكن شونده ي بولسه هم بيرقنچه ايش بيلرمان لرتاماندن تيل رواجله نيشي اوچون ايجابي آديم بولگني ايتيليب بيراق بو بوتون طلب لرني قانديره آلمه گن حركت لرديب هم كوريلماقده .