افغانستان و امریکا مذاکره لری دوام تارتماقده

افغانستان دولتی، امریکا و مذکور مملکت آره سیده گی اوزون مدتلی ستراتیژیک سندی ، بن انجمنی نینگ ایککینچی یغینیدن آلدین راق امضا بولیشیگه امید بیلدیرگن.

تشقی ایشلر وزیرلیگیگه کوره، افغانستان و امریکا مقام لری تمانیدن یولگه قوییلگن اوچینچی یغینیده، کیچه تمانده گی حربی عملیات و قماق خانه لرنینگ اداره بولیشی بوتونلی افغان حکومتی گه تاپشیریلیشی توغری سیده کیلیشیلگن.

اوشبو وزیرلیک مقام لری نینگ معلوم قیلیشیچه، هر ایککله مملکت آره سیده گی ستراتیژیک سند نهایی بولیش اوچون مذاکره لر دوام تارتماقده.

امریکا و افغانستان آره سیده گی اوزون مدت لی ستراتیژیک سندی، هر ایککله مملکت نینگ کیله جکده گی رابطه لری نینگ تعیین قیله دی.

هرچند، افغانستان حکومتی مذکور سند نینگ بن انجمنی دن آلدین راق نهایی بولیشی اوچون امید بیلدیرگن، بیراق تشقی ایشلر وزیرلیگی نینگ سوزچیسی جانان موسی زی گه کوره، اوشبو سند نینگ امضا بولیشی اوچون زمان جهتی دن هیچ قنده ی ضرب العجل تعیین ایتیلمه گن.

بوندن آلدین راق امریکا لیک بیر دیپلومات هم افغانستان و امریکا آره سیده گی ستراتیژیک سند ، بن انجمنی دن آلدین راق امضا بولیشیده امید بیلدیرگن ایدی.

حاضر افغانستان ملی امنیت مشاوری باشچیلیغیده گی بیر هیئت، مذکور سند نینگ جزییاتی اوستیده بحث قیلیش اوچون واشنگتن ده دیر.

موسی زی جنابلری گه کوره، حاضر گه قدر مذکور سند ده، کیچه تمانده گی حربی عملیات لر و افغانستانده گی قماق خانه لر مسوولیتی نینگ افغان لر آلیشی توغری سیده امریکا بیلن موافقت بولگن.

اوشبو سند نینگ امضا بولیشی یانیده، بن انجمنی نینگ ایککینچی یغینی هم افغانستان دولتی نینگ مهم برنامه لریدن حسابلنه دی.

اوشبو کنفرانس ده اسلامی حزبی نینگ رهبری گلبدین حکمتیار مستقل سیاسی بیر جریان صفتیده، اشتراک ایتیشی ده علاقه کورسه تگن اما مذکور یغین ده هر قنده ی مستقل سیاسی جریان اشتراک ایتیشی نی افغانستان دولتی رد قیلیب، بن نینگ ایککینچی یغینیده، فقط افغانستان دولتی آتیدن بیر هیئت کیتشی نی معلوم قیلگن.