حقانی: مذاکره اوچون طالبان قرارینی دستکلی میز

حقانی ترماغی نینگ رهبری سراج الدین حقانی رویترز خبرآژانسیه سی بیلن بولگن صحبتیده، طالبان گروهی کینگاشی افغانستان کیله جگی اوچون قندی قرار چیقارسه اوشبو قرارنی دستک له شینی معلوم قیلگن.

افغانستان بویلب یوزبیریب کیلگن گروهی هجوملرده سونگی پیتلرده کوپراق حقانی ترماغی نینگ قولی بارلیگی تاکیدله نیب کیلینرایکن، اوشبو گروه باشلیغی سراج الدین حقانی رویترز آژانسی بیلن نامعلوم منطقه دن بولگن تیلفونی علاقه سیده قوراللی طالبان کینگاشی افغانستان کیله جگی اوچون قندی قرارگه کیلیشسه اوشبو قرارنی دستک له شینی ایتگن.

طالبان رهبری ملامحمد عمر بیره مناسبتی بیلن چیقارگن بیاناتیده ایلک بار تینچلیک اوچون معقول توشگن هرقندی یوللرنی تیکشریلشینی تاکیدله گندی.

عینی حالده حقانی ترماغی نینگ باشلیغی، تیلفونی صحبتیده بوندن الدینلر مذاکره گه راضی بولیشلری اوچون بیرقنچه یوقاری چوکی لر سوزبیریلگنینی اورغوله گن، اونگه کوره بوکبی تکلیف لر اوشبو گروه نینگ بولینیشگه سبب بولیشی باعث قبول قیلنمه گن.

شونینگ دیک او اوز صحبتی دوامیده حاضرگی شرایطده حقانی ترماغی نینگ افغانستان ده کی فعالیتی کینگی یبب باره یاتگنینی ایتیب، هیچ قندی خطر حس قیلمس لیک لرینی معلوم قیلگن.

شونگه قوشیمچه قیلیب سراج الدین حقانی بیرقنچه یوقاری مرتبه لی پلیس کوچلری وافغان حربی لری نینگ اوشبو گروه بیلن علاقه ده بولیب همکارلیک قیلیب کیله یاتگنینی هم تیلفونی صحبتیده علاحیده تاکیدلب اوتگن.

امریکا مقاملری حقانی ترماغی نینگ رهبرلرینی قوشنی پاکستانده بولگنینی ایتیب ، پاکستان جاسوس لیک خذمتینی اوشبو گروه بیلن علاقه ده بولگنینی هم ادعا قیلیب کیلگن.بیراق، پاکستان دولتی بوکبی ادعا لرنی دایما رد ایتماقده.

اوتگن سه شنبه کونی کابلده اویشتریلگن هجوم ده امریکا مقاملری حقانی ترماغی نینگ قولی بارلیگی گه عیب له گن ایدی.

شونینگ دیک بوندن بیرقنچه مدت الدین کابل جنوبیده جایلشگن میدان وردک ولایتیده کی ناتو حربی مرکزیده اویشتریلگن هجومده حقانی ترماغی عیبلنگن ایدی.

یوزبیرگن هجومده امریکا کوچلری نینگ 77 عسکری یره لنگنی خبرقیلگندی.

شونینگ دیک یوزبیریب کیلگن باشقه قطار هجوملرده بو گروه نینگ قولی بارلیگی ایتیله دی شوباعث ،امریکا قوشمه ایالت لری حقانی ترماغی باشلیغی سراج الدین حقانی نینگ اولدریش یاحبسگه الیش اوچون بیش ملیون امریکا لیک دالر هم جایزه اعلان قیلگن.