کابلده گی اوزبیک طلبه لر احوالی قنده ی؟

سونگی ییل لرده افغانستان لیک اوزبیک طلبه لر نینگ سانی، کابلده گی دولتی و خصوصی عالی اوقویورت لریده انچه کوپه یگن.

عالی اوقویورت لر وزیرلیگی نینگ معلوم قیلیشیچه، هر ییل اوتیشی بیلن، دولتی و خصوصی عالی اوقویورت لرنینگ جذب قیلیش ظرفیت لری کینگه یماقده.

مذکور وزیرلیک مقام لریگه کوره، اوتگن نیچه ییل دن بیری، افغانستان لیک اوزبیک لر سانی باشقه قوم لر قطاریده دولت نینگ معتبر عالی اوقویورت لریده کوزگه کورینرلی درجه کوپه یگن.

کابل نینگ مرکزی یاتاق خانه سی گه حیات کیچیره یاتگن اوزبیک طلبه، نجیب الله مسعود، اوتگن تورت ییل دن بیری اوزبیک یاش طلبه لر نینگ سانی کوپه ییب باریشی گه گواه بولگن.

نجیب الله، مرکزی یاتاق خانه ده حیات کیچیره یاتگن اوزبیک طلبه لر، بیر بیراویدن هر دایم خبر دار بولیب، اولتیریش توریش لری بارلیگی نی هم معلوم قیلگن.

اونگه کوره، مذکور یاتاق خانه ده، بدخشان، تخار، قندوز، بغلان، سمنگان، بلخ، جوزجان، سرپل و فاریاب ولایت لریدن کیلگن اوزبیک طلبه لر حیات کیچیریب، اگرده مذکور طلبه لرنینگ بیریگه بیران قیین چیلیک تاپیلسه، بیر بیراولری بیلن یاردم بیریشه دیلر.

باله لر دن تشقری، اوزبیک قیز طلبه لر هم کابل عالی اوقویورت لری نینگ ایریم فاکولته لریگه تحصیل قیلماقده.

تخار دن کیلیب، انجنیر لیک فاکولته سیگه طلبه بولگن، حلیمه گه کوره، اوزبیک قیز طلبه لرنینگ کوپ قسمی هم قیزلرنینگ مرکزی یاتاق خانه سیگه حیات کیچیره دیلر.

اونینگ معلوم قیلیشیچه، قیزلر حیات کیچیره یاتگن یاتاق خانه نینگ تورلی قوله یلیک لری بار.

اما دولتی عالی اوقو یورت لریده گی اوزبیک طلبه لردن تشقری، خصوصی فاکولته لر گه درس اوقی آتگن اوزبیک طلبه لر هم انچه کوپه یگن.

بدخشان دن کیلگن همایون نظری گه کوره، او بیلن بیرگه، باشقه تورت کیشی بیر فاکولته ده خصوصی شکلده تحصیل قیلماقده.

نظری جنابلری، ییرته لب دن تا ساعت تورت نماز دیگر گه چه، بیر دفترده ایشله ب، آقشام تماندن فاکولته اوقیشی نی معلوم قیلدی.

شو نینگ دیک، فرهنگی آیدین انجمنی نینگ خادم لری ایسه، افغانستان پایتختی بیلن قوشیمچه شمال شرق وشمالی حدود لرده قریب 500 اوزبیک طلبه لر اوچون نیچه یاتاق خانه تیارلب بیرگن لریدن خبر بیرگن لر.

مذکور انجمن باشلیغ لریدن محمد عارف صدری نینگ معلوم قیلیشیچه، آیدین تمانیدن کابل ده ایجاد ایتیلگن یاتاق خانه ده قریب 50 اوزبیک طلبه گه جای بیریلگن.

صدری جنابلری گه کوره، جایی بولمه گن باشقه اونلب اوزبیک طلبه لر گه یقین کیله جکگه کابلده گی یاتاق خانه ده جای بیریشه دیلر.

صدری جنابلری، آیدین انجمنی تمانیدن توزه تیلگن یاتاق خانه لرده طلبه لرگه کتاب خانه، کمپیوتر لر، و باشقه تورلی قوله یلیک لر یره تیلگنی نی ایتیب، طلبه لر درس لری نینگ یخشی شکلده اوقیش لری اوچون ایریم ریجه لر عملی بولیشی نی هم ایتدی.

افغانستان عالی اوقویورت لر وزیرلیگی نینگ معلوم قیلیشیچه، مملکت ده حاضر 26 دولتی و 50 خصوصی عالی اوقویورت لر فعالیت قیلیب، مذکور عالی اوقو درگاه لرده، 140 مینگ طلبه تورلی قوم لردن تحصیل قیلماقده لر.

هرچند افغانستان حکومتی، طلبه لرنینگ جذب قیلیش ظرفیتی عالی اوقویورت لریده، کوپه یگنی نی ایتسه ده لیکن افغانستان بویلب، مینگلب یاش طلبه ایریم دلیل لر سببلی، عالی اوقو درگاه لرده یول تاپه آلمه ی سرنوشت سیز شکلده قالگن لر. و هر ییل اوتیشی بیلن مذکور طلبه لر سانی کوپه ییب کیتماقده.