لویه جرگه ایککی مینگ کیشی اشتراکی بیلن باشلندی

اوشبو جرگه ده خلق نماینده لری قوشیمچه ایریم سابق جهادی رهبرلر، کابینه اعضاسی وافغانستان جمهورریسی حامدکرزی حصصه قوشگن.

جرگه نینگ باشله نیشیده صبغت الله مجددی اوشبو جرگه نینگ موقت رییسی صفتیده تعین ایتلدی.

جرگه اشتراک چیلری کیله جک تورت کون جریانیده طالبان بیلن مذاکره قیلیش همده امریکا و افغانستان اره سیده استراتیژیک همکارلیک علاقه لرنی امضاله نیشی خصوصیده بحث قیله دیلر.

لویه جرگه قتیغ خوف سیزلیک چاره تدبیر لر بیلن باشلندی. جرگه یقنیده کی یوللرترافیک یوزیگه باغلنگن همده یان اطرافیده کی اویلر خوف سیزلیک خادملری تمانیدن جدی تیکشریلگن.

شونینگ دیک خوف سیزلیکنی توله تامین لش اوچون قوشیمچه پلیس کوچلری کابل شهری نینگ تورلی منطقه لریده جایلشتریلگن.

طالبان عصیانچیلری بیر بیانات ترقه تیب جرگه اشتراک چیلرنی اولیم جزاسی بیلن تهدید قیلگن، عینی حالده جرگه اوچون الینگن خوف سیزلیک برنامه لرینی قولگه کیرتگنلرنی ادعا قیلگنلر.

باشقه تماندن ایریم سیاسی گروه لر لویه جرگه نی بولیب اوتیشگه قرشی لیک بیلدریب بو جرگه نی قانونی ایمس لیگینی ایتگنلر.شونگه علاه پارلمان کینگاشی نینگ ایریم وکیللری هم جرگه گه قرشی لیک بیلدرگن.

ایریم تحلیل چیلر باشلنگن جرگه نی ایش بیرمسلیگینی ایتماقده لر.

افغان مقاملری جرگه ده الینگن قرار لرنی قانونی تمانی بولمه گنینی ایتیب حکومت اونینگ عملی قیلیشگه مجبور ایمس لیگینی معلوم قیلگن.

همده مقام لر امریکا بیلن استراتیژیک همکارلیک علاقه لرنی امضا لش پارلمان تصدیق دن اوتیشی کیره ک لیگینی اورغولب لویه جرگه نی یولگه قویلیشدن مقصد مردم بیلن مصلحت قیلش دیه توصیف له گن.