طالبان بیلن مذاکره لر ینه باشلنه دی

Image copyright AP

تینچلیک کینگاشی نینگ عالی بیر مقامی گه کوره، طالبان گروهی بیلن مذاکره لر ینه یولگه قوییلیشی باشلنه دی. مذکور کینگاش دارالانشا رییسی محمد معصوم ستانکزی نینگ ایتیشیچه، طالبان گروهی سیاسی بیر دفتر آچیش لری بیلن، مذاکره لر جریانی عملی مرحله سیگه کیریشی ممکن. طالبان بیلن مذاکره لر بولیشی اوچون یولگه قوییلگن لویه جرگه حمایت بیلدیریشی آرتیدن، تینچلیک کینگاشی مذاکره لر باشلنیشی دن خبر بیرگن. تینچلیک کینگاشی نینگ قدیمکی رییسی برهان الدین ربانی خودکش لیک بیر هچوم نتیجه سیده دنیا دن کیتگنی دن کیین، افغانستان حکومتی طالبان بیلن مذاکره لر یولگه قوییش توغری سیده سیاستی نینگ اوزگرتیریلیشی معلوم بولگن ایدی. شو نینگ دیک، ربانی جنابلری هلاک بولگنی دن کیین، حکومت طالبان بیلن مذاکره قیلیش جریانی نی توخته تیب، جمهور رییس کرزی طالبان بیلن مذاکره قیلیش اورنیده، پاکستان بیلن مذاکره بولیشی اوستیده تاکید قیلدی. اما عالی تینچلیک کینگاشی نینگ یوقاری مرتبه لی اعضا لریدن معصوم ستانکزی ایسه، لویه جرگه طالبان بیلن مذاکره قیلیش توغری سیده حمایت بیلدیریشی دن کیین، مذکور کینگاش ینه بیر مرته طالبان بیلن باشلنیشی نی معلوم قیلدی. ستانکزی بی بی سی بیلن بولگن صحبتیده، طالبان گروهی بیلن قنده ی مذاکره قیلیشی تینچلیک کینگاشی نینگ جلسه سیده مطرح بولگنی نی ایتیب، مذکور گروه بیلن انیق بیر آدرس آرقه لی تماس آلیش لرینی بیلدیردی. "انیق بیر موضوع بو دیر که اگر مذاکره بوله دی مقابل کیشی لر افغان بولیشی شرط. شو نینگ دیک اولر انیق بیر آدرس لری بولیشی کیره ک. افغانستان حکومتی مملکت یشاوچی لری نینگ سیسی نی مصالحه قیلیش اوچون چیقردی. ایندی بو مسئله طالبان و باشقه مخالف گروه لر گه باغلیق و اولر قه ییرده بولیش لری نینگ انیق قیلیشی هم کیره ک. شو نینگ دیک اولر نینگ انیق نماینده لر کیم بولگنی و قه ییرده مذاکره لر یولگه قوییلیشی نی ایتیش لری کیره ک." ستانکزی جنابلری شونگه قوشیمچه قیلیب، اگر ده طالبان گروهی سیاسی بیر دفتر آچیشی بیلن موافق بولسه لر، افغانستان ایچکری سی اینگ یخشی محل بولگنی نی معلوم قیلدی. بوندن آلدین راق، طالبان تمانیدن، خارجی اولکه لر جمله دن سعودی عربستان و ترکیه ده سیاسی دفتر لر آچیلیش احتمالی بارلیگی ایتیلگن ایدی. اما مذکور گزارش لر ترقه تیلیشی بیلن طالبان گروهی حاضر گه قدر رسمی شکلده افغانستان دولتی بیلن مذاکره قیلیش اوچون هیچ قنده ی تمایل کورستمه گن لر. افغانستان ده گی برچه خارجی کوچلر نینگ چیقیب کیتیشی، طالبان گروهی دولت بیلن مذاکره قیلیش اوچون اینگ اساسی شرط لریدن حسابلنگن اما طالب لر نینگ مذکور شرطی افغانستان نینگ حاضرگی شرایطی ده ممکن سیز دیب معلوم بولگن.