اون یتی یاشلی صفی الله اوندن آرتیق ریاضی فورمولینی کشف ایتگن

Image copyright bbcuzbek
Image caption صفی الله ، ایککی کورس ده اوزیگه اوخشه گن یتیم وقشاق باله لرگه ریاضی ،فزیک ، کامپیوتر و انگلیس تیلی نی تیکین درس بیریب کلماقده

هرات ولایتی پشتون زرغون ولسوال لیگیده دنیا ده کبلگن بو ممتاز یاش باله مکتب نی التی صنف گه چه بو منطقه ده موفقیت بیلن توگتگن.

صفی الله نینگ آنه سی اوز فرزندی استعدادنی یوکسلتریش اوچون بیش ییل الدین هرات شهریده کوچب کلدی.

او، اون تورت یاشی دن ریاضی، فزیک، کبمیا، کامپیوتر و انگلیس تیلی اورگنیشی گه قیزقیب اوچ تورت ییل مدتیده بو ساحه لرده کوزگه کورنرلی موفقیت لر قازانگن.

اواون اوچ ریاضی معادله یا فورمول لرنی کشف ایتب هرات ولایتی عالی اقویورتیدن تصدیق نامه الگن.

صفی الله بونگه علاوه حاضرگه قدر اوچ کتاب هم تالیف قیلگن بو حقیده شوندی دیدی :" اوچ کتاب تالیف قیلگن من .بیرمینگ و بیش یوز صحیفه دن عبارت بولگن بیرینچی کتابیم ریاضی علمی حقیده و ایکنچی سی ایسه کانکور قتنه شووچیلری اچون کیمیا علمی بویچه اوچ مینگ سوال و جواب دن عبارت بولگن . اوچنچی کتابیم هم کامپیوتر ده انگلیس تیلی ارونی توغری سیده یازلگن دیر. بونگه علاوه(13) اون اوچ ریاضی فورمول لرنی کشف ایتم که البته هرات عالی اقویورتی ساینس مرکز تمانیدن تصدیق لندی ."

Image copyright bbcuzbek
Image caption صفی الله نینگ آنه سی به دولت شخص لر اوییده کونده لیک ایش قیلیب اونینگ تعلیم خرجتینی تامین لیدی

یتیم اوسکن صفی الله نی انه سی دن باشقه یقین قوم وقرنداشی یوق . او حاضرگه قدر هیچ بیر دولتی و نادولت ارگان تمانیدن دستک لنمگنی نی ایتیب فقط یللیک بیش یاش ده بولگن انه سی ، کونده لیک روزغار لری نی تامین لش اچون اهالی اوی لریگه باریب نان پیشیریب و کیر یویب صفی الله نی تعلیم خراجتی نی تامین لماقده .

صفی الله دن ، کله جکده قی سی بولیم ده تحصیل قلیش نیتینگ بار دیب سورگنیم ده بوندای جواب قیتره دی :"کله جکده شفاکار بولیشیم نی آنم هردایم ارزو قلر. منی اوچون کوپ جورلگن آنم ارزو سی نی تامین لش و اوزیم گه اوخشه گن قشاق ، یتیم و اقتصادی ضعیف بولگن کشی لرگه خذمت قلیش اچون اگر خدا خواه له سه طب فاکولته سی نی اوقیش نیتیم بار دیدی ."

صفی الله یاش لرگه نمه ایتماق چی سن دیب سورگنیم ده منه بوجمله نی علحیده تاکید لیدی . " وقتینگیزنی هر بیر ثانیه سیدن فایده لنگ.چونکه بیر ثانیه وقت میز نی قول دن بیرسک اگر ملیون لرچه مبلغ هم صرف له سک اونی قیتره آل می میز."

صفی الله کمپیر آنه سی بیلن حاضر هرات شهری اوچنچی ناحیه سیده اهالی بیرگن بیرکیچگینه و نم باسکن تام ده کون کیچره دی . آنه سی هرچند اوفرزندی احتیاج لیک لرنی تامین لش اچون هرقندای قیینت چلیک ومحنت نی چیده گن اما اونی یارقین کیله جگیده امیدی کاتته ایکنی دن بوندای سوز یورته دی :"بو باله دن من بوتکل راضی من بو بیش یاش لیگیدن نه نماز نی قضا قلگن نه هم درس و تعلیم نی ترک ایتکن . اگر من خواز وزار بولدیم اما او شکر الحمدلله یخشی یول گه ادم باسگن. الله تعالی برچه یاش لرگه موفقیت بیرسون و بو یتیم باله نی توغری یول گه هدایت قلسون وارزوم شو که فرزندم بیرشفاکار بولیب و تاپکن پولی نی اوزدیک یتیم وقشاق باله لرگه صرف له سون بوندن باشقه هیچ آرزوم یوق دیدی صفی الله نی انه سی."

صفی الله هرات شهری سلطان غیاث الدین غوری لیسه سی اونبرنچی صنف نی بترگن او بیش ییل دن بویان بو لیسه نینگ عمومی اول نمره سی بولیب کلگن

صفی الله حاضرگه قدر 50 دن کوپراق تقدیر نامه تحسین نامه و سرتفکیت الیش گه موفق بولگن.

Image copyright bbc
Image caption صفی الله مکتب اوقوتوچیلری یعنی اوز استاد لری تمانیدن نابغه دیه توصیف له نه دی

.سلطان غیاث الدین مکتبی اورن باسری غلام ربانی دانشجو صفی الله نی کورگنی دیک هه نابغه قندای سن دیب اونی القیش له دی . دانشجو جناب لریدن صفی الله حقیده سورگنیم ده بو بیر نابغه دیب لیکن هرات محلی رسمی لری خصوصا معارف ملازم لری بو ممتاز اقوچی نی ترغیب ایتیش ویا اونی اقتصادی قیینت چلیک لری نی برطرف ایتیش اچون دقت گه سزاوار یاردم بیرمگنی لریدن اچقچه تنقید لیدی .

" بو باله کشف ایتکن ریاضی فورمول لردن اعزاز لش اچون مکتب اداره سی یولگه قویگن احتفا ل ده مکتب معلم لری و اقوتوچی لر آته آنه لریدن باشقه هیچ بیر کیمسه خصوصا معارف و عالی اوقویورت رسمی لریدن بیران کشی هم قنتش مه دی .معارف ریاستی تمانیدن تشویق بولیش لازم ایدی اما بول مه دی .چون بو ممتاز باله یازگن کتاب لرنی چاپ ایتیش ده مکتب میز نی اونچه لیک بودجه یوق .اما دولت یا مدنی جمغرمه لر همده اولکه میز نیگ بای لری بوایش نی قله اله دیلر لیکن معارف رسمی لری بو موضوع گه اصلا عنابت کورست مه دیلر.بویا زگن کتاب لرنی بیز اوقیب کوردیک اوته فایده لی .خصوصا کانکور قتنشچی لری اچون ."

صفی الله هرچند حاضر ایککی کورس ده اوزیگه اوخشه گن یتیم وقشاق باله لرگه ریاضی ،فزیک ، کامپیوتر و انگلیس تیلی نی پول سیزطریقه ده درس بیریب کلماقده اما آنه سی اوز فرزندی کتاب ، قلم ، کیم کیچک وباشقه کیرک لی بولگن اشیالرنی تامین لش اچون قوشنی لری اوی لریده باریب اغر ایش لرنی بجریشی دن اصلا عار و ننگ قل می من دیدی . اما صفی الله نی آنه سی اونی یارقین کله جکی ده امید تیکن.