هلمند ولایتیده گی خودکش لیک هجوم، عادی اهالی گه تلفات ییتکزگن

Image copyright BBC World Service

هلمند ولایتی نینگ مرکزی لشکرگاه شهریده یوز بیرگن خودکش لیک هجوم نتیجه سیده، اوچ کیشی هلاک بولگن و 31 نفر هم یره لنگن.

محلی رسمیلرگه کوره، خودکش هجوم چی هلمند ولایتی قیته قوریش گروهی یا پی آر تی نینگ ملکی ایشلاوچی لرگه قرشی یولگه قوییلگن.

هلمند حاکمی نینگ سوزچیسی داوود احمدی گه کوره، مذکور هجوم هلمند ولایتی بناسی نینگ یقینیده یوز بیرگن. مذکور هجوم گوجوم بولگن بیر منطقه ده عمل گه آشیریلگنی باعث، جانی تلفات دن تشقری، اون موتر دن آرتیق یانیب کیتگن.

حادثه ده یره لنگن کیشی لر لشکرگاه کسل خانه سیده درمان آستیده بولگن لری بیلگی لنگن.

سونگی پیت لرده لشکرگاه شهری نینگ خوف سیزلیک مسوولیت لری ناتو کوچلری تمانیدن افغان لرگه تاپشیریلگن ایدی.

شو نینگ دیک هلمند ولایتی نینگ نادعلی و مارجه اولوسوالیگی نینگ مسوولیت لری هم افغان کوچلریگه تاپشیریلیشی ریجه لنگن.

طالبان گروهی آغدریلگنی دن کیین، هلمند ولایتی مملکت نینگ اینگ خوف لی ولایت لریدن حسابلنیب کیلگن اما اوتگن ایککی ییل دن بیری مذکور ولایت وضعیتی یخشی بولیب کیلگن ایدی.

بوحالتده قرگنده، حاضر هم مذکور ولایت نینگ بعضی حدود لریده عصیانچی گروه لر اینیقسه طالبان گروهی کوزگه کورینرلی درجه ده فعالیت لری کوزه تیلماقده.