"افشار ده یوزبیرگن قتل عام عامل لری محاکمه بولسین"

یوزلب بامیان اهالیسی وایریم مدنی فعاللر اوشبو ولایت مرکزیده ناراضیلیک نمایش یولگه قویب کابل نینگ افشار منطقه سیده یوزبیرگن قتل عام عامل لرینی محاکمه ایتیلیشینی طلب قیلگنلر.

افشار حادثه سی بوندن 19 ییل آلدین ایچکی اوروش لر دوریده یوزبیرگن.

ناراضلیک نمایش یولگه قوییگن شخص لر افشار محله سیده یوزبیرگن حادثه نی "قتل عام " اتب بو حادثه سبب چیلرینی محاکمه بولیشینی عدلی وانسان حقلرینی سقلش تشکیلات لریدن طلب قیلیب چیققن.

حاضرگه قدر هم افشار حادثه سیده قنچه انسان قربان بولگنی حقیده انیق حسابات یوق . اما نمایش چیلر اوشبو حادثه ده اینگ آز700 کیشی هلاک بولگنینی ادعا قیلگن لر.

مستقل انسان حقلرینی سقلش کمیسیونی افشار ده یوزبیرگن حادثه و شونگه اوخشش حادثه لر اوستیدن تیکشرو اوتکزیلیب حجت لر تیارلنگنینی ایته دی.

مستقل انسان حقلرینی سقلش کمیسیون مسووللریدن بیری وحید الدین ارغون، بی بی سی بیلن بولگن صحبتیده بوحقده شوندی دیدی :" اوروش جنایت لریگه عاید تیارلنگن حسابات نینگ نشر ایتیلیشی گه حکومت ده فعالیت آلیب باره یاتگن ایریم یوقاری مربته لی خادملرتوسیق بولیب کیلماقده ."

اوتگن حادثه لر باره سیده مستقل انسان حقلرینی سقلش کمیسیونی تمانیدن تیکشرو الیب باریلیشی گه افغان حکومتی و دنیا جماعت چیلیگی موافقت بیلدیرگندی.

بو برنامه اوتیش عدالت دوری نامله نیب، مستقل انسان حقلرینی سقلش کمیسیونی تمانیدن حجت لشتریش بولیمی عمل گه آشریلگن. کمیسیون مسووللریگه کوره، اوچ اون ییللیک حادثه لر باره سیده تحقیقات اوتکزیلیب حجت لر تیارلنگن. لیکن اوشبو حسابات نینگ حاضرگه قدرهم نشر ایتیلمه گنی تورلی خیل تنقید لرگه سبب بولگن.