برماغی، عمر یولداشی تمانیدن پیشریب ییلگن عارفه حکایه سی

25 یاش ده بولگن عیال ، عمریولداشی اونینگ برماغی نی کیسب پیشریب یگنی و اوچ یاش لیک قیزفرزندی نی اولدیرگنی حکایه سینی بیان ایتدی.

هرات قارلوچی سی ماریابشیر بو 25 یاش ده بولگن عیال گه قرشی اویشترلگن زوروان لیک نی اوته دهشت لی اته گن .

بوعیال اوتکن کونی هرات شهری یقینی ده جایلشگن دوغ اباد محله سی یشوچی لری یاردمی بیلن هرت پولیس گه شکایت ایتکن و پولیس هم اونی عمر یولداشی نی توتقین ده آلگن.

زوروان لیکه دچار بولگن 25 یاش لی بوعیال توقیز ییل دن بویان اوته یمان وضعیت ده کون کیچیریب کیلگن.

او توقیز ییل الدین ایران ده مهاجرت ده یشش پیتی ده اوز عمر یولداشی بیلن اویلنیب سکز ییل ایران ده یشب و بو مدت ده اوز آوازی نی بیران قانونی مرجع گه یتکزیش گه موفق بوله آلمه گن.

عیال لرگه قرشی زوروان لیک افغانستان ده ینگی بیر موضوع ایمس ، اما بو عیال گه نسبتا اویشترلگن زوروان لیک اینگ دهشت لی .

عارفه اوز حکایه سی نی بوندای باشلی دی : "مین گه ایتی بارپیکنیک و قیچی نی الیب کیل ، کباب تیار لی من دیدی .من ایتیم که یخچال ده گوشت یوق . ایتی بار .سن الیب کیل من گوشت تاپه من دیدی . ایتکن نرسه لرنی الیب کیلدیم .پکنیک نی یاقتیم. قیچی نی الیب برماقم نی شدت بیلن قرق ماقچی بولدی .قیچی اوتمس ایدی شونی اچون حتی کوکسم گه اولتریب برماقم نی قرق دی .قان فواره اوردی .برماقم قرقلیب ییرگه توشتی .برماق جان بیر دی .باشی نی کسگن قوش کبی .من درد شدت دن یغلردیم. او برماق نی پکینک یوز ده کباب قلیب یه دی .استخوانی نی هم الدیم گه تشله دی."

بو عیال شونینگ دیک تاکید لیدی عمر یولداشی اونی بطنی ده گی باله سی نی قیز یا ارکک ایکنی نی بیلیش اچون قارنی دن چیقاریب الیش گه سعی قیلگن . و اگر بطنی ده گی باله قیز بولسه عمر یولداشی اونی اولدریه من دیگن . بوعیال نی عمر یولداشی بونگه کفایه ایتمی اوچ یاش ده بولگن قیزلاق باله سی نی هم اولدیرگن دیدی :”اوچ یا ش لیک قیزم نی اولدیر گنی گه تورت کون بولدی .اوتکن شنبه اخشامی اوخلب یاتکن دیک ،کیچه ساعت اوچ بجه قیزلاغیم اویغنیب سو ایسته دی . سو بیردیم . اونی قیته یاتقیزیش اچون جایم دن توردیم . بلردیم اگر قیزه لاقم یغله سه آته سی توریب منی کلتک لیدی .هرقنچه قلدیم اوخله مه دی. قیته یغله دی .آته سی اویقی دن اویغنیب اوچر سسنگ دی دیب پوپسه قیلدی .قیزلاقم دم بول مه دی کوپراق یغله دی .سن بونی دم قل می سن دیب منی هم اوردی . قیزلاق تاباره یغلردی . شو پییت ده قوچاغیم دن الیب باش دن ایلنتریب ییرگه اوردی قیزلاق نی . اغزیدن غرپلب قان کلدی. او جابجا جان تسلیم قیلدی .من بالم نی اولدیردینگ دیب داد وفریاد قلسم ،او ملتیغی نی الیب، اگر قیزیم نی آته سی اولدیر دی دیسنگ سنی هم اولدره من دیب منگه پوپسه قلدی . "

بو عیال هرات پولیسی و محل اهالی سی یاردمی بیلن بوندای وضعیت دن قوتلگنی دن خرسند لیک بلدریب عمر یولدالشی جزالنترلیشی نی دولتی اداره لردن طلب ایته دی .

هرات قاره لوچی سی ماریا بشیر خانم بو عیال اوز حکایه سی نی اخبارات واسطه لرگه بیان ایتکن دن کین اونی عمر یولداشی گه اشد جزانی محکمه دن طلب ایته من دیدی:

" بو عیال گه قرشی عمر یولداشی تمانیدن اویشترلگن جنایت ، جمله دن اونی اوچ یاش ده بولگن فرزندی نی اولدریلیشی ، برماقی ولبی کسیشی و باشقه اویشترلگن جنایت لر اچون بیز بو مجرم گه اشد جزا نی محکمه دن طلب ایته میز انشالله."

خانم بشیر گه کوره جاری ییل اول دن حاضر گه قدر هرات ولایتی ده عیال لرگه قرشی اویشرلگن زوروان لیک لردن 205 دوسیه محکمه گه جونتلکن:

"بیز جاری ییل نینگ اوتکن اون بیر آی گه قدر عیال لرگه قرشی اویشترلگن 205 دوسیه نی تکمیل قلیب محکمه گه جونتگن میز . بیز عیال لرگه قرشی دهشت لی زواوان لیک لراویشترلیشی دن بوتون مملکت خصوصا هرات ده کوپ دن کوپ تشویش گه میز .چونکه عیال لربیر قطار اقتصادی قیینت چلیلک لر بیلن حاضر چه اونچه لیک قانون حمایتی گه ایکه ایمس لر مینمچه بو زوروان لیک لر اوته دهشت لی و اونی تیب بولمس بیر تراژی دی دیر ."

خانم بشیر گه کوره عیال لرگه قرشی اویشترلگن زوروان لیک لر عموما قتل ، کلتکلنیش و عیال لرنی حقارت قلیش دن عبارت بولگن . اما بیر عیال برماقی نی کسیب ییشش بوتکل ینگی بیر حاثه دیر . بوندای جنایت هرچند انسان آزار لیک کسل لیگی گه اوخشی دی اما هرات دکی روحی کسل لیک لر شفاکار لری بو ندای بیمار لیک حاضر گه قدر هرا ت ده کوز گه کورن مگن دیدیلر

عیال لرگه قرشی زوران لیک لر هرات ولایتی ده اوندای بیر حال ده کوپی گن که جاری ییل ننینگ اول دن حاضر گه قدر 80 عیال هم اوزی اوزیگه اوت قویگنی هرات کسل خانه سیده رویخط گه النگن. ایتیلیشیچه بو رقم دن 80% دنیا دن کوز یم گن.

افغانستان عیال وزیز لیگی ترقتکن حسابات ده کوره جاری ییل نینگ اوتکن توقیز آی ده بوتون افغانستان ده عیال لرگه قرشی 4850 زوروان رویخط گه النگن.

هرچند افغانستان ده عیال لر حق حقوق لریدن حمایته ایتیش اچون یوزلب چه دولتی و نادولت ارگان لر فعالیت قلیب کلماقده اما بو ارگان لر تمانیدن بو پدیده گه قرشی یول گه قویلگن چاره تدبیر لر اونچه لیک مثبی نتیجه بیرمگن.

کورنیشی دن عیال لر حق حقوق لریگه نسبتا اهالی نی عنعنوی توشینچه لری نی اوزگرتریش هر تمان له مه دستور لر یولگه قویلیشی کیرک لیگی دن علاوه اوزاق مدت ، وقت نی هم طلب ایته دی .