عبدالله کرزی نینگ سیلاو لرده اره لشیشدن خواطرده

Image copyright .

دولت گه سیاسی مخالفت بیلدریب کیله یاتگن ملی اتفاق رهبری افغانستان جمهوررییسی نی سیلاولر مسله لری بویچه خلق ارا نهاد لر رولی نی کمیتریشگه اورینه یاتگنی گه عیبله دی.

عینی حالده اوشبو اتفاق باشلیغی داکتر عبدالله عبدالله کرزی اوز طرفدارلرینی مستقل سیلاولر و حقوقی ارگان لرگه وظیفه لنتره یاتگنیدن خواطیر اظهارایتدی.

ریاست جمهورلیک سیلاو نینگ یولگه قوییلیشی گه اینگ آز ایککی ییل قالگن، لیکن حاضردن باشلب سیلانی شفاف بولیب اوتمسلیگی خصوصیده شکایت لر یوزه گه چیقماقده. بوکبی خواطیر لر کوپراق حکومت گه سیاسی مخالفت بیلدیریب کیله یاتگن اتفاق لر تمانیدن ایلگری سوریلماقده.

افغانستانملی اتفاق رهبری داکتر عبدالله عبدالله بوکونگی اوتکزگن مطبوعات یغینیده، افغانستان جمهوررییسی حامدکرزی کیله سی ریاست جمهورلیک سیلاو نتیجه سینی اوزیگه معقول بولگن شخص منفعتی گه ایلنتریش اوچون حاضردن حرکت لرنی باشله گندیب فکر بیلدیره دی."شو کیچه کوندوزده، حکومت و دنیاجماعت چیلیگی اره سیده بحث لر بولیب ، یوناما نینگ افغانستانده بولگن رولینی کمیترماقچی. یعنی کیله سی سیلاو خصوصیده بولگن رولینی، بیزنینگ ایسته گی میز شو کی بیرلشگن ملت لر تشکیلاتی نینگ سیلاولر پروسه سیگه اساسی نقشی بولسین،سیز بیله سیز کرزی جنابلری مستقل سیلاولر کمیسیونی نینگ بیش کمیشنرینی تعین ایتدی، بولرنی همه سی کرزی ادم لری، بومعنی ده کی بیز طرف سیز بیر کمیسیون گه ایگه بولمه یشی میز ممکن."

حاضرگه قدر ریاست جمهورلیک سرای بوخصوصده قندی دیر مناسبت بیلدیرمه گن، لیکن مستقل سیلاولر کمیسیونی ایسه هیچ بیر شخص یا نهاد گه سیلاولر مسله سی گه اره له شیشی اوچون ایزین بیریلمس لیگینی تاکیدلیدی. مذکور کمیسیون اعضالریدن محمد حسین گرزوانی بی بی سی بیلن بولگن صحبتیده خلق ارا نهاد لردن کیله جک سیلاونی نظارت قیلیشی طلب بولینیشینی ایتیب اوشبو ارگان گه قره ته ایتیلگن عیبلاو لرنی رد ایتدی.

افغانستان ریاست جمهورلیک سیلاو یولگه قوییلیشی 2014 میلادی ییلده خارجی کوچلرنی بواولکه دن چیقیب کیتیش زمانی بیلن توغری کیله دی. خوب شوندی بیرحالده کیله سی ریاست جمهورلیک سیلاو قنچه لیک شفاف بولیب اوتیشی ممکن. فیفا یا ایرکین سیلاو لر قوریلمه سی نینگ اجرای مسوولی جان داد سپین غر شوندی دیدی:"حکومت نینگ قدرتی بار، شوپله دن باشلب اصلاحات کیلتریشگه حرکت قیلمه سه لر کوپ عیبلاو لر بیلن دوچ کیلیشی ممکن، بواصلاحات نی کیتریش اوچون کرزی جنابلری اعتبار قره تیسن، مدنی جمعیت قوریلمه لر وسیاسی حزبلر مصلحت لری اورگه نیلیسن، تاکی مردم اره سیده کیله جک سیلاو ی شفاف بولیب اوتیشی اوچون ایشانچ تاپیلیسن. بو گپ کوپ مهم دیر."

بوندن بیرقنچه مدت الدین افغانستان جمهوررییسی حامدکرزی مستقل سیلاولر کمیسیو نینگ بیش اعضاسینی تنله دی. اما کمیسیون اعضالرینی تنلش میکانیزمی هردایم تقید لر بیلن بیرگه بولیب کیلگن، کرزی حکومتی گه سیاسی مخالفت بیلدریب کیله یاتگن شخص لر ایسه کمیسیون اعضالرینی کرزی تمانیدن تعین ایتلیشی اوشبو کمیسیون مستقللیگینی سوال استی قویشینی ایتیب کیلماقده لر. 2010 میلادی ییلده بولیب اوتگن ریاست جمهورلیک سیلاوده کرزی نینگ اساسی رقییب بولمیش داکتر عبدالله عبدالله کمیسیون اعضالرینی کرزی منعفتی گه ایش قیلگنی گه عیبله گندی.