اولوسی جرگه 1391 ییلی نینگ مالی بودجه سینی رد ایتدی

Image copyright Reuters

افغانستان اولوسی جرگه سی 1391 قویاش ییلی ده گی مالی بودجه نینگ توازنی بولمه گنی دلیلی بیلن رد قیلگن. اولوسی جرگه اعضالریگه کوره، افغانستان ولایت لریده اجره تیلگن رواجلنتیریش بودجه هم توازنی نظرگه توتیلمه گن. مذکور جرگه جمهور لیک ریاستی سرایی خوف سیزلیگی نینگ تامین لش و باشقه مسئله لری توغری سیده اجره تیلگن 14 ملیون دالر بودجه حقیده هم قرشی لیک کورسه تگن. بوندن آلدین راق سنا مجلسی هم 1391 قویاش ییلیده گی بودجه طرحی نی عادلانه سیز دییشیب، مملکت مالیه وزیری نی مذکور جلسه سیده چقیرگن ایدی. 1391 ییلیده گی مالی بودجه تورت اعشاریه 8 ملیارد دالر بولگن. مذکور مبلغ نینگ ایککی اعشاریه 7 ملیاردی عادی یا"جاری" و قالگنی ایسه رواجلنیش بودجه گه تیگیشلی. شونده ی بیر حالده مالیه وزیرلیگی، ولایت لرده اختصاص بیریلگن مالی بودجه لر کوپراق یول لر نینگ توزه تیش و برق بولیمیده صرف لنیشی نی ایتیب، مذکور بودجه همه ولایت لرده بیر رقم بولیشی امکانی یوق دیب معلوم قیلگن. عین دمده، جمهورلیک ریاستی سرایی نینگ خوف سیزلیگی نی تامین لش اوچون اجره تیلگن بودجه سیدن حکومت رسمیلری آرقه داش لیک بیلدیرگن. حکومت گه کوره، بلند مقام لی رسمیلری و جمهور لیک ریاستی سرایی امنیتی نینگ سقله ش مهم مسئله لردن حسابلنیب، شو اوچون کوپراق مبلغ اجره تیش کیره ک. حکومت رسمیلریگه کوره، جمهورلیک ریاستی سرایی ده ایشله یاتگن قریب اوچ مینگ ایشلاوچی نینگ آی لیک لری هم مذکور بودجه دن بیریله دی. حکومت نینگ 1391 ییلی ده گی پیشنهاد بولگن بودجه سی شونده ی بیرحالده اولوسی جرگه تمانیدن رد بولگن که، 1389 ییلیده مصرف بولگن بودجه توغری سیده حکومت و پارلمان آره سیده گی جنجل لر حل بولمه ی قالگن. اولوسی جرگه نینگ معلوم قیلیشیچه، قریب 14 وزیرلیک، 40 فایزدن آز راق رواجلنتیریش بودجه سی نی مصرف قیلگن. اولوسی جرگه بو مسئله اوچون مذکور وزیرلیک لردن جواب ایسته ماقده.