کرزی، طالب لردن معارف گه قرشیلیک قیلمس لیکلرینی ایسته دی

Image copyright Reuters

افغانستان جمهور رییسی حامد کرزی ینگی تعلیمی ییل نینگ باشلنغیچ مراسمیده، طالبلردن تعلیم و تحصیل قیله یاتگنلرگه قرشی لیک هجوم اوییشتیرمسلیک نی طلب قیلدی. کرزی جنابلری، مکتب لرنینگ ایشیگی نی باغلش، افغانستان خلقی بیلن دشمن لیک، حیات لری بیلن همده دین لری و اسلام بیلن دشمن لیک ایکنی نی معلوم قیلدی. افغانستان جمهور رییسی حامد کرزی هر دایم طالبان و باشقه عصیانچی گروه لردن مکتب لرگه قرشی هجوم اوییشتیرمه سلیک لرینی طلب قیلیب کیلگن. " اگر بولر مکتب نی اولکه ده باغله یدیلر، بولر یورتیمیز آزادلیگیگه ایمس لر بلکه مملکت نینگ غلام لیگیگه بوله دیلر. بو لر خواه له یدیلر که مملکت غلام شکلده قالسه. محتاج قالسه، همسایه و و اوزاق ده گی مملکتلرگه محتاج بولسه. ایناغه صفتیده التماس بیلن مینی آرزوم بو که بولر مکتب لرنی باغله مسین لر. معلم گه ضرر یتکزمه سین لر. دین عالمی گه ضرر یتکزمه سین لر. مدرسه لر و مکتب لرده گی طلبه لرگه ضرر یتکزمه سین لر." معارف وزیرلیگی نینگ بیرگن رسمی حساباتی گه کوره، افغانستان بویلب، حاضر تورت ملیون باله دن کوپراق ایریم دلیل لر طفیلی جمله دن تینچ سیزلیک لر باعث، تعلیم و تحصیل دن محروم. شو نینگ دیک تورت یوز مکتب دن کوپراق هم مملکت نینگ تینچ سیز منطقه لرده باغلیق قالگن. بونگه قرگنده، طالبان گروهی اوتگن نیچه ییل دن بیری جمهور رییس کرزی نینگ هر ییل کی قیله یاتگن التماس لرینی نظرگه توتمه ی مکتب لرنینگ یاندریشگه قول اورگن لر. بوگون کی یولگه قوییلگن یغینده افغانستان معارف وزیری فاروق وردک ایسه، مملکت بویلب قریب 8 یریم ملیون نفر تعلیم کوریشینی اعلام قیلدی. او، جاری قویاش ییلده، ینه بیر یریم ملیون باله افغانستان مکتب لری نینگ روی خطیده اوتیشیگه امید بیلدیردی. مملکتده مسلکی معلم لر آز لیگی معارف تیزیمی نینگ اینگ اساسی قیین چیلیک لریدن حسابلنه دی. اما معارف وزیرلیگی نینگ ایتیشیچه، مملکت معلم لری نینگ تربیه لش اوچون ایریم برنامه لر اوستیده ایشلر جریانی بار. افغانستان دنیا نینگ کوپ سانده کم سوادی بولگن مملکت لردن حسابلنه دی. بیرلشگن ملت لر تشکیلاتی نینگ حساباتی گه کوره، افغانستان نینگ 66 فایز خلقی اوقیش و یازیش گه قادر ایمس.