تقدیری بیللی بولمه گن 70 مینگ طلبه گه تحصیل زمینه سی یره تیلماقده

Image copyright Getty

افغانستان معارف وزیرلیگی مملکت مکتب لریدن فارغ بولگن 70 مینگ طلبه اوچون، اورته مخصوص تعلیم درگاه لری گه تحصیل آلیش زمینه لری نی یرتیشی نی اعلام قیلگن. مذکور 70 مینگ طلبه اوتگن کانکور سناویده مملکت عالی اوقو درگاه لریده کیره آلمه گن شخص لر بولیشی بیلگی لنگن. اوتگن قویاش ییلیده 160 مینگ یاش کانکور سناویده قتنه شیب، بو جمله دن فقط 40 مینگ کیشی مملکت عالی اوقو درگاه لریده یول تاپه آلگن لر. افغانستان معارف وزیرلیگی چوکاتیده فعالیت قیله یاتگن اورته مخصوص تعلیم درگاه لر، تخنیکی و مسلکی انستیتیوت لر، دارالمعلمین لر و دارالعلوم لر گه جاری ییلده 70 مینگ طلبه نینگ جذب ایتیلیشینی اعلام قیلدی. مذکور موسسه لرده هر ییلی 30 مینگ طلبه جذب ایتیلریدی لیکن جاری ییلده معارف وزیرلیگی بو تعلیمی موسسه لر ظرفیتی نی کینگه یتیریشی دن سوز یوریتگن. معارف وزیری فاروق وردک نینگ ایتیشیچه، مذکور تعلیم درگاه لرده کانکور سناویده 240 نمره دن کوپراق آلیب نتیجه سیز قالگن شخص لرگه بیرینچی اورین بیریله دی. "اگر مینگه کوپ نمره آلگن کاندید موجود بولسه، مین آز نمره آلگن نامزد نی قبول قیلمه یمن. بیر بوتون انسانی، مادی، معنوی و کدری ظرفیت لریمیزنی امکان گه قدر کینگه یتیردیک. درس اوقیش زمان نی ایککی وقت گه اجره تدیک، بیر معلم دن بیر حق زحمه بیریش بیلن ایککی اوچ ییرده فایده لنه میز، تحویل خانه و پیاده خانه لرنینگ همه سینی صنف توزتیب، ظرفیتی میز نینگ 70 مینگ گه چه کوتاردیک." اوتگن نیچه ییل دن بیری مکتب لردن فارغ بولگن مینگ لب یاش طلبه گه، مملکت نینگ عالی اوقو یورت لری یا ده اورته مخصوص تعلیم درگاه لریده کیریش لری اینگ کتته آرزو گه ایلنگن. بو ییل لرده مینگ لب یاش ایریم دلیل لر سببلی مذکور آرزو گه ایریشمه گن لر. کورینیشیچه، اگرده مملکتده گی عالی و اورته مخصوص تحصیل درگاه لری نینگ ظرفیتی کینگه یمسه، مملکت یاش طلبه لری، مسلک سیز شکلده قالیب کیتیشی هم کوپه ییب کیته دی. معارف وزیرلیگی نینگ بیر گن حساباتی گه کوره، جاری قویاش ییلده، قریب 250مینگ یاش مملکت مکتب لریدن فارغ بوله دی. شو نینگ دیک ، کیله سی بیش ییلگه قدر مکتب لردن فارغ بوله یاتگن یاش طلبه لر سانی یریم ملیون شخص گه ییتیشیشی بیلگی لنگن.