ملت وکیللری : ییللیک بودجه ده کیرتیلگن اوزگریش لر قانیقرلی ایمس

افغانستان اولوسی جرگه سی ییللیک بودجه ده کیرتیلگن اوزگریش لرنی قانیقرلی ایمس دیب بودجه نی قیته کوریب چیقیش قرارینی صادر ایتدی.

جاری ییل ییللیک بودجه سیده بوتون ولایت لرده تینگ مبلغ اجره تیلمه گنی همده ساغلیک وتعلیم بولیم لریده اجره تیلگن مبلغ اوته آز لیگی ملت وکیللری نینگ اساسی تنقیدی بولگن.

افغانستان مالیه وزیرلیگی ملت وکیللری نینگ بوکبی تنقید لریگه ماس ییلیک بودجه ده ایریم اوزگریش لرنی کیرتیب ینه ده پارلمان گه تقدیم ایتگن لیکن ایککینچی بار اولوسی جرگه گه یوباریلگن ییللیک بودجه ده کینگ اصلاحات کیرتیلمه گنی ملت وکیللری تمانیدن اورغولندی.اعتراض بیلن چیققن ملت وکیللریدن بیری صدیق احمد عثمانی بوحقده شوندی دیدی:"مالیه وزیرلیگی، ییللیک بودجه ده ایریم اوزگریش لرنی آلیب کیلگن شو اساسده فقط تورت میلیون دالر بودجه ده قوشیمه قیلینگن بودجه نی کمیتریش وکوپیتیریش افغانستان ملتی نینگ دردینی دوا قیله آلمیدی،بیزنینگ ایسته گیی میز مسلکی وتخصصی موضوع لردن عبارت ایدی."

شونینگ دیک 14 میلیون امریکا لیک دالرنی خوف سیزلیک بولیم لری و ریاست جهمهورلیک ایشلریگه اجره تیلگنی هم ملت وکیللری نینگ ایلگری سورگن تنقید لریدن بیری ایدی.

شوندی قرمه قرشی لیک لر یوزه چیقیشی بیلن ایریم ملت وکیللری بودجه نی قیته کوریب چیقیش اوچون مخصوص بیر کمیسیون توزیلیشینی تکلیف ایتدی.

شو اساسده کمیسیون دوشبنه کونی گه چه بودجه باره سیده آلیب بارگن تیکشرو نتیچه سینی ملت وکیللریگه اچیق لب اوندن کین بودجه نی تصدیق لش اوچون آواز بیریش جریانی یولگه قویلیشی ممکن.

1391. ییل نینگ ییللیک بودجه سی 4.8 میلیارد دلار دن عبارت بولگن. بو جمله دن 2.7 میلیارد دلاری عادی بودجه بولیب باشقه قالگنی ایسه رواجلنتریش بودجه گه تیگیشلی.

بوندن آلدین افغانستان سنان مجلیسی هم ییللیک بودجه نی غیر عادلانه دیب تنقید استیده آلگندی.

ییللیک بودجه نی پارلمان تمانیدن تصدیق له نیشی هردایم جنجل لرگه سبب بولیب کیله دی . باشقه تماندن ایسه اوتگن ییل بودجه خصوصیده یوزه چیققن جنجل لر هلی هم حل بولگنی یوق، چونکی پارلمان کینگاشی قرق فایزدن یوقاری ییللیک بودجه سینی مصرف قیلیشگه قادر بولمه گن وزیرلیک لرنی حساب بیریش لری کیره ک لیگنی تاکیدلب کیلماقده.