نورستان ده اوتیز دن آرتیق طالب هلاک ایتیلگن

Image copyright Demotix

نورستان رسمیلری، مذکور ولایت کامدیش اولوسوالیگیگه حربی عملیات یولگه قوییب، حاضرگه قدر، طالبان گروهی نینگ اوتیز دن آرتیق نفری نی هلاک قیلگنلیگی نی ایتگن لر. رسمیلرنینگ ایتیشیچه، مذکور عملیات نتیجه سیده، طالبان گروهی نینگ بیر قنچه قوماندان لری هم نابود ایتیلگن. بو عملیات ملی اردو نینگ کوماندو کوچلری تمانیدن اوچ کون ایلگری یولگه قوییلیب، حاضر هم دوام تارتماقده. نورستان نینگ کامدیش اولوسوالیگی انچه دن بیری طالبان نظارتی آستیده ایدی، لیکن رسمیلر گه کوره، مذکور اولوسوالیک نینگ 80 فایز حدودی طالبان قولی دن آلینیب، دولت نظارتیگه اوتگن. نورستان والی سی تمیم نورستانی مطبوعات ده بیرگن معلوماتی اساسیده، اوچ کون دن بیری یولگه قوییلگن حربی عملیات نتیجه سیده، اوتیز دن آرتیق طالبان اعضاسی هلاک بولگن همده مذکور گروه نینگ اوتیز دن آرتیقی یره لنگن. نورستان محلی رسمیلری طالبان نینگ کامدیش اولوسوالیگی دن یوق ایتیش اوچون یولگه قوییلگن عملیات ده بیر عادی اهالی و بیر پولیس عسکری هلاک بولگن و ملی اردو کوچلری نینگ تورت عسکری هم یره لنگن دیب ایتگن لر. نورستان والی سی، خود شو عملیات لرنینگ باشقه اولوسوالیک لرده یولگه قوییلیشی نی هم معلوم قیلگن. شونینگ دیک آیساف کوچلری تمانیدن ترقه تیلگن بیر بیاناتده نورستان نینگ کامدیش اولوسوالیگیگه افغان کوچلری تمانیدن یولگه قوییلگن عملیات موفقیت لر قولگه کیریتگنی نی ایتیب، ناتو نینگ باش قوماندانی جنرال جان آلن آتی دن ملی اردو کوچلری نینگ آلقیش له گن. مذکور بیاناتده، افغان کوماندو کوچلری مذکور عملیات نینگ یخشی شکلده بجرگنی، خوف سیزلیک مسوولیت لرنینگ آلیش گه تیار ایکن لیگی نی کورسه ته دیب معلوم بولگن. محلی رسمیلر، نورستان نینگ کامدیش اولوسوالیگی ده ملی اردو و پولیس کوچلری نینگ ینگی عسکر لری جایله شیشی نی معلوم قیلگنلر. مملکت شمال شرقی حدودی ده جایلشگن نورستان ولایتی ستراتیژیک نقطه نظری دن یخشی موقعیت گه ایگه. مذکور ولایت پاکستان بیلن چیگره سی بولگنی اوچون هر دایم عصیانچی گروه لر تمانیدن کوز قره تیلگن.