جنرال دوستم افغانستان شمالیده کی طالبان نفوذیدن خواطرده

Image copyright BBC World Service

جنرال عبدالرشید دوستم مملکت نینگ شمالی حدودلریده طالبان عصیانچیلری نینگ فعالیت لری آرتیب باره یاتگنیدن خواطر اظهارایتدی.

دوستم مذکور اظهاراتنی ملی جبهه تمانیدن شبرغان شهریده اویشتریلگن یغینده یوریتگن.

اونگه کوره، اگرده شمالی حدودلرده طالبان فعالیتی آلدی آلینمه سه کیله جکده جدی معما گه ایله نیشی ممکن.

شونینگ دیک دوستم جنابلری، طالبان صلح پروسه سی گه قوشیلمه گنده اوز طرفدارلری نینگ طالبان گروهی گه قرشی جدی کوره شیش گه چقیریب ، افغان امنیتی کوچلریدن حمایت بیلدریش گه اورغوبیردی.

باشقه تماندن جنرال دوستم، چیت ایللیک کوچلرنی زودلیک بیلن افغانستان دن چیقیب کیتیشی افغانستان منفعتی گه ایمس لیگینی هم ایتیب، شوندی بیرحالده وضعیت یمان له شه دی دیب فکر بیلدیردی.

عینی حالده افغانستان ملی اسلامی جنبش حزبی نینگ رهبری، جنرال عبدالرشید دوستم طالبان عصیانچی لری قورال لرینی ییرگه قویب صلح جریانی گه " شبهه" سی بارلیگینی ایتیب بوحقده شوندی دیدی:

" قریب قرق مینگ افغانستان دشمنلری، اولکه نینگ چیگره حدودلریده کمین گه اولترگنلر اولر، فرصت قولگه کیرتیشی بیلن مملکت ده طالبان رژیمی نینگ حاکمیت گه کیلتریش مقصدیده."

مینگلب شخص اشتراکی بیلن یولگه قوییلگن یغیندن اساسی مقصد ملی جبهه برنامه لرینی آچیق لش ایکنی اورغولنگن.

اوشبو یغینده نه فقط جوزجان بلکه، فاریاب، تخار، سرپل، بلخ وسمنگان کبی ولایت لردن ملی جبهه طرفدارلری حصصه قوشگنی ایتیلماقده.

همده ملی جبهه باشلیغی احمد ضیا مسعود و ملی جبهه نینگ اساسی اعضالریدن محمد محقق لرهم یغینده اشتراک ایتیب، ملی جبهه برنامه لری توغریسیده معلومات بیرشگن.

جنرال دوستم ملی جبهه نینگ اساسی برنامه سي، کیله جکده جاری تیزم نینگ ریاستی دن پارلمانی گه اوزگرتریش بولگنینی اورغولب، مردم نینگ بو برنامه دن حمایه قیلیشی گه چقیردی.

عینی حالده او، ریاست جمهورلیک تمانیدن ملی جبهه برنامه لریگه قرشی بیلدریلگن مناسبت لرنی قتیغ قاره لب اوشبو جبهه حرکت و برنامه لرینی قانونی ایکن لیگینی تاکیدله دی.

اونگه کوره " جمهورلیک تیزم، افغانستان احتیاجینی برطرف قیلیشی گه قادر ایمس، جاری وضعیت گه قره گنده قدرت نینگ مردمی لشتریش کیره ک. ولایت و تومن حاکم لری مردم تمانیدن سیله نیشی مملکت نینگ جاری وضعیت دن قوتقاریش گه اساسی رولی بولیشی ممکن."

ملی جبهه باشلیغ لری بوندن آلدین هم امریکا سنا مجلسی نینگ ایریم وکیللری بیلن کابل و برلین ده قوشمه مطبوعات انجمنی اوتکزیب، جاری تیزم نینگ پارلمانی گه اوزگرتریلیشی کیره ک لیگینی تاکیدله گن ایدی.

اما افغانستان ریاست جمهورلیک سرای ملی جبهه نینگ بو برنامه سی گه قرشی فکر بیلدردی. شونگه قوشیمچه جمهورلیک تیزمی نینگ خلق تمانیدن معقول لنگنینی ایتیب، تیزم نینگ اوزگرتریشگه هیچ کیمنی حقی یوق لیگینی تاکیدله دی.

شونینگ دیک کرزی جنابلری امریکا و افغانستان دولت لری آره سیده امضالنگن استراتیژیک بیتیمی ده جاری تیزم دن حمایت قیلینیشی قید ایتیلگنینی ایتگن.