افغان عیاللری میراث حقی نی قنده ی آلیشی کیره ک؟

Image copyright AFP

عیال لر میراث و زمین گه ایگه چیقیش حقی آتی بیلن امریکا یاردمی تشکیلاتی تمانیدن بوگون کابل گه بیر یغین یولگه قوییلدی. مذکور یغین ده افغانستان عیال لری، اوز حق لریگه ایگه چیقیش لری اوچون، سعی و حرکت لری کوپه یشی توغری سیده تاکید بولدی. افغانستان کبی سنتی بیر مملکت ده عیال لر تورلی حق لریدن ایریم دلیل لر سببلی، واز کیچه دیلر. اوز حقیگه ایگه چیقه آلمه گن افغانستان نینگ مینگ لب عیال لریدن بیری بونده ی دیدی: "میراث اوچون ایناغه لریم نی آلدیگه کیتدیم اولر بیرمه دیلر مینی حقیمنی. ینچیب اوریب، چیقردی، کیلمه گین باشقه بو ییرگه دیدی. بیز هم شکایت قیلمه دیک، رابطه میز ایناغه لریم بیلن بوتکل بوزیلدی. منه ایککی ییل بولدی باریش کیلیش یوق. اوی سیز ایدیم بارگنیم ده، اما خوجه یینیم قویمه دی دعوا آچسم، نیمه قیله سن جنجل توغدیریب دیدی. اگر اوز لری بیلیب بیرسه لر یخشی بولمسه دعوا قیلمه گین دیدی. شریعت ایتگن که اکه و اوکه نی حقی برابر، اگر ایناغه حق نی بیرمه سه مین عیال حالیم بیلن نیمه قیله آله من؟" افغانستان قانون لریده عیال نینگ اساسی حق لریدن ایککی ته سی کوپراق مهم دیب کورسه تیلگن. بو حق لرنینگ بیرته سی مهر حقی بولسه باشقه سی هم میراث حقی دیر. اما مملکت ده عیال لر اوستیده ایرکک لر حاکم لیگی کوپراق کوزگه کورینه دی. عیال لر میراث و مهر حق لریگه ایریشمه گن لری یانیده باشقه ایریم قیین چیلیک لر بیلن هم یوزمه یوز. اما افغانستان عیال لر وزیرلیگی و اونگه عاید باشقه نهاد لر، عیال لر اوز حق و حقوق لریگه ایریشیش لری اوچون قوشمه حرکت لر ینی جدی لشتیریشی نی ایتماقده. اوتگن اون ییل ایچیده، عیال لر اوز حق لریگه ایگه بولیش لری همده زوراوانلیک لرگه قرشی کوره شیش توغری سیده مملکتده فعالیت قیله یاتگن عیال لر وزیرلیگی و شونگه اوخشش اونلب ایرکین نهاد لر فعالیت قیلماقده لر. بو جریان ده شهر لرده حیات کیچیره یاتگن عیال لر بیرآز گینه اوز حق لریدن آگاه بولگن لری کوزگه کورینه دی لیکن، مملکت چیککه حدود لریده گی عیال لر، تورلی زوراوانلیک لر بیلن حیات کیچیرماقده لر.