ملی جبهه ده گی ضدیت لر چقور لشه یاپتدیمی؟

Image copyright BBC World Service

ملی جبهه اعضالری نینگ بیری نجیب الله کابلی مذکور جبهه عضویتی نی ترک ایتگن. کابلی جنابلری، ملی جبهه خارجی مملکت لردن پول قولگه کیلتیریب، افغانستان نینگ بولیشگه فعالیت قیلیشینی ادعا قیلگن.

اما ملی جبهه کابلی جنابلری نینگ مذکور سوزلرینی بوتونلی رد قیلیب، یلغان دیب توصیف له یدی.

ملی جبهه سوزچی سی فیض الله ذکی نینگ معلوم قیلیشیچه، نجیب الله کابلی، حکومت ده گی حلقه لر تمانیدن سو استفاده بولیب، جبهه آدرسی گه بونده ی سوزلرنی یوریته دی.

ملی جبهه حکومت سیاستی گه قرشی لیک کورسه تیب بوندن قریب 7 آی آلدین رسمی شکلده فعالیتده باشله دی.

بو جبهه حاضر گه قدر مملکت شمالی ولایت لریده مردم اشتراکی بیلن نیچه یغین اوتکزگن.

بو یغین لرنینگ بیریده ملی اسلامی جنبش حزبی نینگ رهبری جنرال عبدالرشید دوستم، ملی جبهه بوندن کیین هیچ بوزیلمه یدی دیب شعار بیرگن ایدی.

خود شو یغین لردن کیین، مذکور جبهه نینگ اساس چی لریدن من دیب تانیشتیره یاتگن نجیب الله کابلی، مذکور جبهه رییسی احمد ضیا مسعود نینگ سمبولیک بیر شخصیت دیشیب، جنرال عبدالرشید دوستم و محمد محقق پاکستان و ایران دن پول آله دیلر دیب ادعا قیلگن.

نجیب الله کابلی دن تشقری بیرقنچه حکومت رسمیلری هم حکومت قرشی سیده فعال بولگن سیاسی گروه لرنی تنقید آستیده آلگن لر. بولرنینگ بیرته سی هم بلخ حاکمی عطا محمد نور دیر. نور جنابلری بوندن بیر نیچه کون مقدم، اپوزیسیون جریانیده کیرگن شخص لر دولت خادمی بولگنده حکومت دن حمایت قیلیش لرینی ایتسه لرده بیراق حکومت دن چیت لنتیریلگنی دن کیین، باله لردیک حکومت نی تنقید آستیده آله دیلر دیب معلوم قیلگن.

لیکن بو مسئله قرگنده، ملی جبهه سوزچی سی فیض الله ذکی بی بی سی بیلن بولگن صحبتیده، نجیب الله کابلی حکومت ده گی حلقه لر تمانیدن سو استفاده بولیب جبهه گه قرشیلیک کورسه تیشی نی معلوم قیلدی.

ذکی جنابلری، کابلی ملی جبهه نینگ فقط بیرینچی اولتیریشی ده اشتراک قیلیشی نی ایتیب باشقه بو جبهه بیلن هیچ قنده ی علاقه سی بولمه گنی اوستیده تاکید قیلیب اوتدی.

اخیر گی پیت لرده مملکت نینگ جمهورلیک ریاستی سیلاولری یولگه قوییلیشی سوزلری چیقیشی بیلن بیر قنچه سیاسی گروه لر یغیلیشیب، خاص سیاسی حرکت لرنی یولگه قویگن لر.

اما مذکور سیاسی گروه لر بیرلیگی اونچه لیک هم دوام قیلمه ی، کوپ حالت لرده ساچیلیب کیتگن لر.

مملکت کیله سی سیلاولری 2014 نچی ییل ده یولگه قوییلیشی بیلگی لنگنی دن کیین، احمد ضیا مسعود باشچیلیغی بیلن ملی جبهه ایجاد ایتیلگن. جنرال عبدالرشید دوستم و محمد محقق هم مذکور جبهه نینگ مهم اعضا لریدن حسابلنه دی. شونینگ دیک مذکور جبهه فعالیت ده باشله گنی دن حاضر گه قدر بیر قنچه کیچیک گروه لر ملی جبهه اعضا سی بولگن دیب اعلان قیلینگن ایدی. اما مذکور گروه لرباشلیغی نینگب بیری نجیب الله کابلی ملی جبهه عضویتی نی ترک ایتیشینی اعلان قیلگن.