شکردره ده سوو توغانی توزه له دی

Image copyright Reuters

کابل نینگ شکردره تومنیده برق ایشله ب چیقاریش و سوو ذخیره قیله دیگن توغان تاشی تهدابی جمهورریس کرزی تمانیدن قوییلدی.

شاه عروس دیب ناملنگن سوو وبرق توغانی اوچون 48 میلیون امریکا لیک دالر اجره تیلگن. بو مبلغ ایسه حکومت نینگ ترقیات بودجه سی تمانیدن توله نیشی معلوم قیلینگن.

بو پروژه، اوتگن اون ییل جریانیده افغانستانده گی آلتی کیچیک و کتته توغان لردن بیری دیرکه فایده لنیشگه تاپشریش اوچون عملی ایش باشله نه دی.

افغانستان جمهور رییسی حامدکرزی تیک اوچر آرقه لی شکردره ده گی تیپه لردن بیریگه توشیب، تیپه اوستیدن شاه عروس دیب اتلگن سوو توغان ایشینی رسمی شکلده باشله نیش دستورینی بیردی.

اوشبو برق و سوو توغانی ایران لیک بیر شرکت بیلن قرارداد بولگن.

برق ایشلب چیقاره دیگن و سوو ذخیره قیلوچی اوشبو توغان 77 متر یوقارلیکده 42 آی جریانیده قوریلیشی ریجه لنگن.

بو توغان نینگ ایشی توگه گنیدن کیین 1.2 میگاوات برق ایشلب چیقاریش ظرفیتی گه ایگه بولیب همده قریب ایککی منگ 700 جریب ییرنی سولنتریشی ممکن.

بو توغان نینگ قوریش اوچون اجره تیلگن مبلغ افغانستان حکومتی تمانیدن توله نه دی چونکی افغان مقاملرینینگ ایتیشچه، دنیاجماعت چیلیگی بوکبی برنامه لر خصوصیده یاردم کورستمیدیلر.

افغانستان جمهورریسی حامدکرزی بوحقده شوندی دیدی:

"خوب خارجی لر افغانستان نینگ ترقیاتی اوچون اوزون مدتلی ریجه لری یوق، بو بیزنینگ بورجیمیز تا بو ایشلرنی بجرسه ی و بودجه سی نی تاپسه ی. شو نینگ دیک اوزیمیز ریجه قوریب اوزیمیز عملگه آشیرسک. اگر بیز کوتیب اولتیرسک که خارجی لر بیزگه ایشله سین، اولر خواه له من گن نرسه اوستیده ایشله مه یدیلر. و خواه له گن نرسه اوستیده ایشله دیلر. ایشله یاتگن نرسه لری اوچون هم بیز منت دار میز لیکن اولر، ایشله مه یاتگن پروژه لرنی اوزیمیز توزه تیشی میز کیره ک باشقه مملکت لردیک. دیب ایتدی کرزی جنابلری."

باشقه تماندن سو و انرژی وزیری محمد اسماعیل خان هم مذکور پروژه انچه اهمیت گه ایگه ایکن لیگی نی ایتیب، ینه باشقه توغان لر اوستیده ایشلر جریانی بارلیگی نی معلوم قیلدی.

" مملکت ده آلتی توغان اوستیده ایشلر جریانی بار. بیرقنچه توغان لر افتتاح بولیش گه ییتیشگن، و بیرقنچه سی نینگ ایشی هم باشلنگن."

افغانستان نینگ اکثری حدودلریده کتته دریا لر موجود بولیب شوندی توغان لرنی قوریش امکانیت گه ایگه لیکن اوتگن اون ییلدن بیری، بوخصوصده اونچه لیک اعتبار قره تیلمه گنی تورلی خیل شکایت لرنی توغدیرگن.

باشقه تماندن ایریم منطقه لرده ناتینچ لیک لر آرتیب باریشی هم سوو برق توغانلرینی قورییش اوچون توسیق یره تیب کیله یاتگنی ایتیلماقده.

ناتینچ لیک لر و دولت نینگ بوخصوصده قانیقرلی اعتبار قره تمه گنی افغانستان دن قیناق لنگن دریا لر سوویدن کوپراق قوشنی اولکه لر فایده له نیب کیلماقده .