بیر پولیس ضابطی جنسی زورلش عیبی بیلن 15 ییل آزاد لیکدن محروم ایتیلدی

Image copyright

کنر ولایتیده گی محکمه بیر پولیس ضابطی نینگ، اون تورت یاشیده بولگن بیر باله نی جنسی زورلش عیبی بیلن اون بیش ییل قماق جزاسیگه محکوم قیلگن.

محکوم بولگن شخص، کنر ولایتی نینگ استناف قاره لاوچیلیگی نینگ قوریقچی سی دیر.

بو شخص، مذکور باله نینگ حجتی یوق لیگی بهانه سی بیلن، بیر هوتل دن چیقاریب، جنسی زورلشگه مجبور قیلگن لیگی ایتیلگن.

کنر ولایتیده گی محکمه بو عسکرنینگ 15 ییل قماق جزاسیگه محکوم قیلگنی دن کیین، ینه بیر شخص نی هم بو قضیه ده یاردم چی بولگنی اوچون 5 ییل آزاد لیک دن محروم ایتگن.

جنسی زورلنگن باله محکمه ده حاضر ایمس ایدی، لیکن قاضی گه کوره،، بو باله نینگ ایسته گی اساسیده قاره لاوچیلیک بو محکمه ده کیلیشی نی قطعی ایمس ایکن لیگی نی معلوم قیلگن.

اما محکوم بولگن شخص، محکمه حکمی نینگ عادلانه ایمس ایکن لیگی نی ایتدی.

افغانستان بشر حقلرینی سقله ش کمیسیون اعضا لریدن ثریا صبحرنگ نینگ معلوم قیلیشیچه، جنسی زورلش نینگ کوپراق عامل لری دولتی مقام لر یا ده اولرنینگ یقین کیشی لری بولگن. خود شو مسئله اوچون جنسی زورلش قضیه لری آزراق عدلی و قضایی ارگان لرگه تاپشیریله دی.

"مذکور قضیه لر مابینیده کوپراق، والی لر یاده اولوسوال لر قوریقچی لری، والی نینگ سکرتری، همبستگی ملی دفتری نینگ رییسی، شو نینگ دیک ولایتی کینگاش رییسی ایریم ولایت لرده عامل بولگن لر. اما تأسف بیلن، بو شخص لر عدلی و قضایی ارگان لرگه تانیشتیریلمه گن لر. بو شخص لر دولتی موقف لریدن فایده لب، یا که دولتی مقام لر بیلن یقین لیک لری باعث بولیب، جرم لریگه تیگیشلی حجت لرنی اورته دن ایلتیش گه قول اورگن لر."

افغانستانده قیزلر و باله لرنینگ جنسی زورلنیش مسئله سی مهم اجتماعی قیینچیلیک لردن حسابلنه دی. افغانستان بشر حق لرینی سقله ش کمیسیونی گه کوره، یالغیز اوتگن ییلی، قیزلر و باله لرگه تیگیشلی 400 جنسی زورلش مسئله سی قید ایتیلگن.