مدافعه و ایچکی ایشلر وزیرلری رد صلاحیت بولدی

افغانستان مدافعه وزیری عبدالرحیم وردک و ایچکی ایشلر وزیری بسم الله محمدی، اولوسی جرگه اعضا لری تمانیدن رد صلاحیت بولدی لر.

مذکور وزیر لر کنر ولایتی ده راکتی هجوم لر دوام تارتیشی و مملکت ده گی بیر قنچه زنجیره یی قتل لر ناملنگن ترور لر دوام تارتیشی اوچون جواب بیریش مقصدیده بوگون، اولوسی جرگه ده استیضاح بولگن ایدیلر.

اولوسی جرگه نینگ بوگون کی یغینی انچه جنجل لر بیلن ایرته لب ساعت توقیز دن تا 2 توشدن کیین گه چه دوام تارتدی.

بیرینچی دن جلسه باشلنیشی بیلن اولوسی جرگه نینگ تنلنگن بیش اعضاسی مدافعه و ایچکی ایشلر وزیرلریگه ایریم مسئله لر توغری سیده سواللر بیردیلر. کیین ایسه مذکور وزیرلر جواب بیریش گه بیر یریم ساعت لیک وقت تاپیب گپیردیلر. لیکن مذکور وزیرلرگه اعتماد یا ده رد آواز بیریش اوچون ملت وکیل لر آره سیده قتیغ قره مه قرشیلیک لر یوزه گه چیقیب، نهایتده هر عبدالرحیم وردک و بسم الله محمدی جنابلری ملت وکیل لر تمانیدن اعتماد آواز نی قولگه کیلتیره آلمه دیلر.

عبدالرحیم وردک، 146 رد آواز، 72 اعتماد آواز و توقیز آق و باطل آواز نی اولوسی جرگه نینگ 228 کیشی لیک اعضاسیدن قولگه کیلتیردی.

عین دمده، بسم الله محمدی هم 126 رد آوازی، 90 تایید و 12 آق و باطل آوازنی مذکور جرگه دن قولگه کیلتیردی.

افغانستان اولوسی جرگه سی نینگ رییسی عبدالروف ابراهیمی هم وردک و محمدی جنابلری وظیفه لریدن رد صلاحیت بولگن قرار نی ملت وکیل لرگه قرائت قیلدی.

شو نینگ دیک جرگه اعضالری آره سیده یوز بیرگن جنجللر نینگ ویدیو لرینی مخبر لر یوزیگه کیسیلگنی هم خبرنگارلرنینگ غضبی گه دوچ کیلیب، رسانه لر نماینده لری هم مذکور جرگه یغیین توگه مسدن پارلماننی ترک ایتدیلر.