BBC navigation

مزارشریفده ایسکی بویوملر سوداسی قولاچ یاییماقده

Сўнгги янгиланиш 1 октябр 2012 - 07:22 GMT

مزارشریف نینگ سیرقتناو یوللریدن بیریده ایسکی بویوملر سودا مرکزی جایلشگن. اوییرده کوپگینه اوزبیک- تورکمن ساتووچیلری قالین ساتیش ایشلری و کوموش تاقینچاقلر سوداسی بیلن شغلله نیب کیلماقده لر.

مین اوییرده گی دوکاندارلر بیلن گپلشیب، اولرنینگ سودا ایشلرینینگ قنده ی کیچه یاتگنی بیلن قیزیقدیم.

اوشبو کینگ گینه ساحه اطرافیده تورلی خیل ایسکی بویوملرنی کوریب، اولرنینگ نرخی بیلن قیزیقه یاتگن مجازلرنی اوچره تیش ممکن. اَولّلری ایسکی- توسکی نرسه لردن کیشی لر شونچه کی قوتیلیش اوچون اولرنی ساتووگه قوییشسه، ایندیلیکده اولرگه عموم خلق قیزیقیب، اوی- جایلرینی بیزه ش اوچونهم ساتیب آلیشه دی.

دوکانلرگه کیرگنینگیزده ایسه، تور تاماننی قمره ب آلگن رنگمه- رنگ قالینلر، ایسکی زمانلردن تصویر بیره یاتگن پرنجیلر، ایسکی تاغاره لر، حشمتلی پادشاه لرنی ایسله تیب تورگن فیروزه کوزلی کوموش اوزوکلر، پای افزل (پای افزار) لر کبی نیچه بیر قدیمی اسباب- اسکونه لرگه بی اختیار کوزینگیز توشه دی.

مین مزارشریفلیک ساتووچی عبدالغفار نظرینی صحبتگه چارله دیم.

«مین تورکمن اهلیدن من. جوده اوزاق ییللردن بیری شو ییرده دکاندارلیک قیلیب کیلماقده من. مینینگ دوکانمیده قالینلرنینگ یانیده باشقه ایسکی نرسه لرهم کوپ. کونده معلوم ایمس لیکن هر آییده ییگیرمه مینگ، اوتتیز مینگ درآمد قولگه کیلتیره من. سودالریمیزنینگ یخشی- یمانلیگی مردم گه باغلیق. خداگه شکر، روزغاریم یخشی اوته دی شو ایش بیلن.»

اون ییلدن بیری عینی جایده ساتووچیلیک قیلیب کیله یاتگن قربان گیلدی، دوکانیده گی ایسکی بویوملرنی قوشنی اولکه لردن کیلتیریب، ساتووگه قویگنلیگینی ایترایکن، مجازلرینی کوپراق عیاللر تشکیل بیرگنی هم خاطرلب اوته دی.

یانیده پخته گل چاینک، پیاله ده کوک چای ایچیب تورگن ساتووچی عبدالواسع گه اونینگ دوکانیده گی بویوملر دییرلی قیسی ییللر میراثی دیب سوره گنیمده او شونده ی جواب قیتردی:

«بولر دییرلی یوز ییگیرمه ییل آلدین نینگ متاعلری دیر. مینی دوکانیمده ایسکی قولیازمه کتابلر کوپ. بو کتابلرگه هم یوز- ایککی یوز ییل بوله دی.»

صادق هم ایسکی بویوملر سودا مرکزیده ساتووچیلیک بیلن بند بولگن دوکاندارلرنینگ بیری، اونگه کوره، چیت اولکه لر؛ اینیقسه، چین تاماندن کیله یاتگن کیفیت سیز مال- متاعلر افغانستان بازاریده گی جانلیلیکنی قاله ویرسه، عیاللرنینگ قول صنعتینی سولدیرگنگه اوخشه یدی.

کوزه تووچیلرگه کوره، کیینگی ییللرده افغانستان شهرلرینینگ تورلی چیککه لریده ایسکی بویوملر سوداسی قولاچ یاییماقده. اوزگه یورتلردن کیله یاتگن سیاحلرنینگ آز- مونچه ایکنلیگی هم مذکور سودالر بازارلرینینگ کیینگه ییب باریشیگه باعث بولماقده. سونگی ییللرده اندخوی کبی نسبتن کیچیک اولوسواللیکلرده هم ایسکی کوموش تاقینچاقلر سوداسی رواجله نیب بارماقده ایکن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.