BBC navigation

مزارشریفده عیال هیداوچیلر اوچون شرایط قنده ی؟

Сўнгги янгиланиш 9 октябр 2012 - 10:17 GMT

افغانستانده عیال هیداوچیلرنی شهر ایچیده آزراق اوچره تیش ممکن.

افغانستانگه طالبان حکومتی حاکمیت اوتقزیشدن آلدین هیدواچیلیک نینگ ایرکک- عیالی بولمه گن. لیکن سیاسی شرایط دن سونگ عیال قتلمی نینگ فعالیتلری کوپگینه ساحه لرده چیکلندی. دیمک شونده ی ایکن، کوچه بازارلرده موتر هیده ب کیته یاتگن بیر عیالنی کوریش ناممکن ایدی. بیراق، مزارشریف ده بیر نیچه ییل اول، عیاللرگه خاص هیداوچیلیک کورسی آچیلگن.

افغانستانده عیال هیداوچیلرنی شهر ایچیده آزراق اوچره تیش ممکن. کورگن تقدیرده هم، فقط شخصی موترلر ایچیده. افتیدن افغان عیالی اوچون هیداوچیلیک قیینراققه اوخشه یدی. مزارشریفده گی هیداوچیلیک کورسلریدن بیریده موتر هیده شنی اورگنه یاتگن قیزلردن بیری اوز کورگن- کیچیرگنلرینی حکایه قیله دی.

«قیشلاغده گی عیاللر اگر ایشککه مینیب، اوز ایش- یوموشلرینی بجره دیگن بولسه، او اوچون هیچ قنده ی معما یوق. بیملال کوچه لرگه چیقیب یوره آله دی. لیکن شهرده، بیز عیاللر اوچون چیکلاولر تله ی گینه. منه مین سیزگه توناوکونگی بولیب اوتگن حادثه نی ایتیب بیره ی. بازارده، بیکیت دن چیقیب ایلنیب، بوریلیش دن کیین جایلشگن بنا یقینیگه بارماقچی بولدیم. لیکن بیرته- یریمته ایرکک هیداوچیلر یول حرکتی قاعده لریگه بویسنومه ی موتریم نینگ یولینی توتیب مینگه غاو بولماقچی بولدی... اما، بیرکونی کیلیب بو قیینچیلیکلر حل بولر دیگن امیدده من.»

شخصی موتر ایگه سی، مریم خانیم هم مملکت نینگ بیر قطار حدودلریده گی مستقل عیاللر سینگری، ایرته لبکی پیت اوز موتری بیلن ایشگه باره دی. عیال قتلمی نینگ هیداوچیلیک قیلیشلریگه ایجابی فکر بیلدیره دی.

«مثال اوچون توستدن اویده بیرار بیر کیشی کسللنیب قاله دی، هیداوچیلیکنی بیله توریب لیکن اویده بولمه گن ایرکک نینگ یوقلیگینی باشقه لرگه سیزدیرمی درحال اوشه خاندان خاتینی می، قیزی می اویده گیلرگه یاردم بیره دی، یاکی اگر بیرار ناقوله ی شرایط چیقیب قالگن تقدیرده، ینه خوددی شونده ی، بو عیال اوز هیداوچیلیک مهارتیدن فایده لنیب قیینچیلکنی درحال حل قیلیشی ممکن. آته- انه لر اوغیل و قیز باله لری اورته سیده فرق قویمسلیکلری کیره ک. اگر خاتین یاکی قیزلری هیداوچیلیک قیلیشنی خواهله دی می، اولرنی اوز حالیگه قوییشسین، اولرگه یاردم بیریشسین. چونکی، اگر عایله نگ سیندن حمایت قیلدی می، جمیعت هم سین بیلن بوله دی.»

شهرنینگ نسبتن گاوجوم ساحه سیده اوز بیکیتی حسابلنگن نقطه ده موترینی توخته تیب تورگن، تکسی هیداوچیسی عبدالصمدگه عیاللرنینگ موتر هیده شلریگه قنده ی فکر بیلدیره دی دیب سوره گنیمیزده، او شونده ی جواب قیتردی.

«مینی آتیم عبدالصمد، مزارشریف هیداوچیلریدن بیری من. اوتتیز ییلدن بیری مینینگ کسبیم شو. موتر هیده ب کیته یاتگن عیاللرنی کورگنیمده خورسند بوله من. مینگه بری بیر... هیداوچیلیک قیلیشلری توغری. مین اوچون عیاللر هردایم بیرینچی اورینده. مین اوزیم هلیگچه هیچ کیمنی بیزاوته قیلمه گنمن. باشقه لردن هم عیال هیداوچیلرگه حرمت قوییشلرینی ایسته گن بولردیم.»

بلخ اوقوو درگاهی نینگ استادلریدن بولگن خانیم ماریا رهین هم بیلیم یورت بناسی حضوریگه هر کونی اوز موتری بیلن کیله دی. اوزی بو حقده:

«مین اوزیم هیداوچیلیکنی مشق قیلدیم، عاقبتده اورگندیم هم. منه ایندی اوز موتریم آرقه لی به میلی خاطر کونده لیک ایشلریمگه- یم ییتیشه آله من، هم درسگه کیله من. هیداوچیلیک هم عیاللر اوچون بیر ضرورت ایکنلیگینی کوپچیلیک جماعت توشینمه یدی هلی. مین کوپ مراتبه اوزیمگه یاقمه یدیگن ساووق مناسبتلرگه دوچ کیلگنمن.»

هرچند افغانستان نینگ قطار شهرلریده، عیاللرنینگ موتر هیده شلری اوچون مخصوص شرایط یاکی توله تعلیمات یره تیلگنی یوق. لیکن شونگه قره مه ی، هیداوچیلیککه قیزیقه یاتگن خاتین- قیزلر اوزلریگه معقول کیلگن یول بیلن، یاکی ایریم کورسلرگه باریب موتر هیده شنی مشق قیله یاتگنلیکلری کورینماقده.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.