BBC navigation

اوزبيك عياللري هم بورقع ني افضل بيليشماقده لر

Сўнгги янгиланиш 12 январ 2013 - 14:50 GMT

ينگي افغان حكومتي قدرتگه كيلگچ، خاتين- قيزلرنينگ اكثريتي سابق طالبان توزومي دوريده يوريشلري شرط، ديب قوريلگن بورقعلريدن واز كيچيشمه گن.

حاضرگه كيليب، ‌افغانستان نينگ،‌ حتا،‌ اوزبيكستان بيلن چيگره داش شمالي مزارشريف شهريده هم سابق طالبان توزومي دوريده يوريش شرط ديب قوريلگن بورقع سوداسي ينه جانلنماقده ايكن. شهرليك تجارلرگه كوره، ييليگه اون مينگلب بورقع ساتيشماقده.

ينگي افغان حكومتي قدرتگه كيلگچ، خاتين- قيزلرنينگ اكثريتي سابق طالبان توزومي دوريده يوريشلري شرط، ديب قوريلگن بورقعلريدن واز كيچيشمه گن.

امّا، افغانستانده گي طالبان توزومي قولَشيدن اون ييلدن آرتيقراق وقت اوتيب، بوتون طالبلر اياغي ييتمه گن شمالي ولايتلرده هم خاتين- قيزلر بورقعني افضل بيله باشله شيبدي.

مزارشريف بازارلريدن بيريده بوليب قيتگن مخبريميز امير بريال نينگ ايتيشيچه، حتا، بورقعلر طرفه لشيب هم كيتگن.

بورقع لر كوچه- كوي،‌ بازار ياكه تويگه مولجللنگنيگه قره ب فرقلنگني اوچون عياللرنينگ ايكي، اوچته لب بورقع ساتيب آليشلريگه توغري كيلركن.

مزارشريف شهريده گي بازارلرنينگ بيريده بورقع ساته ياتگن حاجي كمال اكه نينگ ايتيشيچه، اوتگن ييل 70.000 ته بورقع ساتگن.

"اوللري چيكّه قيشلاقلردن چادرلرده كيله ياتگن عياللر هم حاضر بورقعگه كيريشگن." دييدي تجار.

مزارشريف شهريده گي مخبريميزگه كوره، شهرنينگ اوزيده هم حاضر بورقع ده يورگن خاتين- قيزلرني كوپ اوچره ته سيز.

اما، بورقع گه كيرمه گنلر هم كوپ بولمه سه-ده، بار.

"مين بورقع ده بوغيليب كيته من. بورقع مينگه ياقمه يدي. بورقع كييگن بيلن آدم حيالي بوليب قالرميدي؟ اگر قيلمه گن ديسه، يمان ايشيني بورقع نينگ آستيده هم قيليش ممكن." دييدي اوز اسم شريفيني سير قاليشيني افضل بيلگن مزارشريفليك قيزلردن بيري.

شهرده اوقيتوچيليك قيليشيني ايتگن عاطفه آپه ايسه، طالبان دوريدن بويان هنوز بورقع ده يوريشيني ايته دي.

عاطفه آپه گه كوره، ايرككلرنينگ كوزيدن قورقيب، اوزي ايستب بورقع گه كيرگن و شو بورقع گه اورگنيب قالگن.

"بيگانه آدملر مينگه قره شسه، اوزيمني ناقوله ي حس قيله من. حاضر هم مينگه بورقع ده يوريش ياقه دي." دييدي او كيشي.

مخبريميز امير بريال نينگ ايتيشيچه، افغانستانده گي سيگه اوخشش عنعنه دار جميعتلرده خاتين- قيزلرنينگ بورقع ده يوريش- يورمسليكلري اساسن ايرككلرنينگ ايستك- خواهشلريگه باغليق.

يعني، اكثريتي هنوز عياللري ياكه قيزلرينينگ بورقع سيزكوچه گه چيقيشلريگه ازن بيريشمه يدي.

ليكن، مخبريميزگه كوره، شهرليك ياشلر حقيده بونده ي ديب بولمه يدي.

اما بورقع گه كيريشني افضل بيله ياتگن خاتين- قيزلر آره سيده ايرككلرنينگ تيگه جانليكلري ياكه اوز خوفسيزليكلريدن خواطرده بولگنلري هم آز مونچه ايمس.

مزارشريفليك خالده نيازي انه شونده ي عياللردن بيري.

"مين چادر تاقمه يمن و بوندن ممنونمن. مكتب ياكه ايش بارگن پيتده اوزيميزني ايسته گن لباسيده بوليشيميز لازم. اما بازارگه بارسم،‌سوزسيز بورقع كييه من. چونكه اوز خوفسيزليگيمدن قورقه من."‌دييدي او.

"مين بورقع سيز اوزيمني ايركين و بختيار حس ايته من. هيچ كيمدن قورقمه يمن." دييدي مزارشريفليك قيزلردن بيري.

محلي جمعیت شناس لرگه كوره، خاتين- قيزلرني بورقع گه كيريشگه اونده ياتگن عامللر ديني بولمه ي، اكثري جميعت نينگ عنعنه دارليگي بيلن باغليق.

"بورقع- ديني نرسه ايمس. اسلام ديني خاتين- قيزلرنينگ يوز و قوللري آچيق بوليشيگه ازن بيرگن. عياللرنينگ قالگن جايلريني عادي لباس هم يشيره آله دي. بورقع ايسه، عياللرني باشدن- اياق ياپيب تشلب، ملاقاتقيليشلريني قيينلشتيره دي. بو ايسه، جميعتگه زيان ييتكزه دي. بورقع ده يوريشلري خاتين- قيزلرنينگ اجتماعي فعالليكلريني پسه يتيريب يوباره دي." دييدي جمعیت شناس تعقي واحدي.

افغانستانده بورقع سيز يورگن فعال عياللر هم آز ايمس. اما اولرنينگ قالگن خاتين- قيزلرني هم جميعت حياتيگه جلب ايتيش اورينيشلري او قدر ثمره بيره ياتگن بيرمه ياتگن بر پيتده،‌ محلي بازارلرگه بورقع لر سوداسي ييل سايين جانلنيب بارماقده. ييليگه اون مينگلب بورقع لر ساتيلماقده.

* تولدریشی شرط بولگن جایلر

Алоқадор мавзулар

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.