BBC navigation

هرات جاده لری قیته قوریلمه گنی اوچون هراتلیک لر نمایش اویوشتیردی

Сўнгги янгиланиш 17 феврал 2013 - 12:44 GMT

یوزلب هرات لیک، شهرنینگ بیرقطار جاده وسرکلری قیته قوریلمه گنی باعث،نا راضلیک نمایش اوتکزدیلر.

نمایشچیلر،اعتراض شکلده اسفالت لنمه گن جاده لر وبوزیلیب قالگن یوللرنی که گیل قیلیب، حتی که نهال هم ایککنلر.

هرات شهری جاده لرینی قیته قوریش دستوری عملگه آشیریلمه گنی، هرات والیسی و شهردارلیک مسوولی آره سیده کیلیشماوچیلیکلر قریب تورت آیدن آلدین یوزه گه چیقیب، هلی هم دوام ایتماقده.

نمایش، هرات جامع مسجدی قرشی سیدن باشله نیب، حاکملیک بناسی قرشی سیگچه دوام تارتگن. ناراضلیک نمایشده قتنشگن لر، هرات شهرداریگه قرشی شعار بیریب، هرات شهریده گی اصلی جاده لر قیته قوریلیشی نی طلب قیلدیلر.

نمایشچیلر، همده سرکلرده اله قچان تاپیلگن چوقورلیکلرنی که گل قیلیب، بعضی جایلرده درخت هم ایکدیلر. اولرشونینگ دیک، شهرمرکزی جاده لریده قیش موسومیده تاپیلگن چوقورلیکلرده سوو تشلب، بلیق هم قوییب یوباردیلر:"بو سرک ده بلیق پرورشی اوچون بیر جای توزتدیک، حاضر نهال ایکیش موسومی دیر. منه شو سرکده نهال ایکیش جایی تپه تیار بولگنی اوچون بیزهم درخت ایکدیک. منه بو چوقورلیکلرنی هم که گل قیلدیک. البته بو که گل نی مخصوص توپراق دن توزتیک. چونکه بو که گل جاده لر اسفالتی دیک تیز خراب بولمه یدی .اینگ آز بیر ییل دوام تاپه دی. شونینگ دیک، سیز بیله سیز که کچالو افغانستانده چیت ایل دن وارد بوله دی بیز منه بو چوقورلیک لرده کچالو ایکدیک. اخیر قچان گچه کچالونی هم چیت دن وارد قیله سیز دییدی، ناراض لیک نمایش نی ریجه لشترگنلردن بیری."

ناراضیلیک نمایش ده قتنشگنلرنینگ اکثریتی بو ایش دن اساسی مقصد، هرات ده گی قیینتچلیک لرنی حل ایتیش ده مرکزی حکومت رسمیلر دقت اعتبارلرینی قرتیش بولگنینی تاکیدلشدیلر:"مرکزی حکومت دن ایستگی میز شو که کیلیب نظارت قیلسین . هرات اهالی سی نینگ هرکونلیک ناراض لیک نمایش اوتکزیش لریدن مقصد لری نیمه بولگنی نی شهر دار و حاکم دن سوره سینلر . نیگه ایش سیز لیک هرکون کوپیب بارماقده ؟ نیگه بو مظلوم ملت گه ظلم وستم بوله دی؟ بولرنی شو مقام لردن سوره سینلر. هرقه ی سی ملامت و تقصیر کاربولسه، قولیدن توتیب چیقاریب قوی بر سین . مردم خدمت قیلمه یاتگن ریس و حاکم نی ایسته می دی. بیز خادم ایسته ی میز،نه خاین دیب ایتی." نمایش ده قتنشکن بو آق ساققال.

هرات شهری نینگ بیرقطار جاده لری نی اسفالتی اخیرگی وقت لرده محلی ملازملر ارا جنجللی بیر موضوع گه ایلنگن. اوشبو دستورنی عملی قیلیش اوچون، هرات حاکمی داودشاه صبا و شهردار محمد سلیم تره کی آره سیده جدی کیلشموچلیک پیدا بولگن.

هرات شهری جاده لرینی اسفالت لش اوچون 750 میلیون افغانی بودجه اجره تیلگنی ایتیله دی، لیکن هرات شهردارلیگی قیته قوریش اوچون اجره تیلگن مبلغ ولایت حاکمی تمانیدن تصدیق لنمه گنی اوچون پروژه ایشی باشلنمه گنینی ایتگن ایدی.

اما هرات حاکمی نیچه مراتبه بو پروژه نینگ اداری باسقیچی قانونی و شفاف روشده طی بولمگنی دن تنقید لب، اونی اجرا ایتیلیشی گه قرشیلیک کورستدی.

هرات حاکمی سوزلاوچیسی محی الدین نوری نینگ ایتیشیچه، اخیرپی کونلرده اوتکزیلگن تیکشرولر سبب لی، هرات شهردار لیگی بو پروژه نی اجرا ایتیش اوچون بونچه لیک بودجه سی یوق لیگی نی تاکید لب، هرات شهرداری شومدت ده اهالی نی الده گن دیب اظهارات بیردی.

شو جنجال لرباعث، هرات حاکمی افغانستان جمهور ریسی گه خط یازیب هرات شهردارلیگی ده جدی و اساسی اصلاحات آلیب کیلیشینی طلب قیلدی. بو خط ده حاکم شونینگ دیک بونده ی شرایط ده هرات ده ایشلش اونگه قیین ایکنی نی هم تاکیدلگن. بو خبر اخیرگی وقتلرده اخبارات واسطه لری آرقه لی کینگ روش ده ترقه لیب، حتی هرات حاکمی استعفا بیریشی احتمالی دن هم سوز اورته گه چقدی، لیکن حاکم، استعفا سی حقیده ینگره گن میش میش لرنی رد ایتدی.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.