BBC navigation

فاریابده گیلم صنعتی نینگ بازاری ساووق لشگن

Сўнгги янгиланиш 25 феврал 2013 - 06:27 GMT

گيلم وقالين اوزبيك خلقي نينگ قديم زمانلردن شغله نيب كيلگن حقيقي قول صنعت لريدن بيري حسابلنه دي.

فاریاب ولايت ده ايشلب چيقاريله ديگن قرايي وغلموري ديب ناملنگن گيلم كوپراق شهرت گه ايگه بولگن.

ميمنه ليك لربو صنعت نينگ بازاري ساووقلشگن ليگيدن شكايت قيلماقده لر.

گيلم سوداگرلري نينگ معلوم قيليش لريچه، آلدين لربو ولايتدن بيرهفته ده بيرنيچه نقليه واسطه گيليم دن توليب پاكستانگه جونه تيلردي حاضرگي كونده بيرآيده بير يوك تشووچي موترده گليم آرتيليب جونه تيلمه يدي.

گيليم بازاري سُستي ليگي سبب گيلم نرخي هم ارزانلشيب كيتگن شوسبب توقيب ساته ياتگن لرهم بوايش دن قول تارته ياتگن لرينی تیلگه آله دیلر.

سراج الدين بوندن بير نيچه ييل مقدم قول بيلن تيارلنه ديگن گيليم وقالين كسبيني قيلرايدي اما او، بوشغل يوريسليگي سبب ترك ايتيب حاضرايراني قالين ايشي بيلن شغللنه ياتگني ني ايتدي.

گيلم فروش لرگه كوره، بوندن بيرنيچه ييل آلدين پاكستان گه گيلم آليب كيته ديگن اونلب سوداگربارايدي، اما هلي بيرنيچيته گه چيكله نيب قالگن.

اگردولت بو صنعت رواجله نيشي اوچون بي فرق ياندشسه كوپ وقت اوتمسدن بو صنعت يوقاليب كيتيشي ني ايتماقده لر.

گيلم بازاري سُست ليگي اوچون نرخي ارزانلشگن بولسه هم خارجي قالين ومكيت ديب ناملنگن توشینچه لرگه نسبتن هلي هم نرخي يوقاري اورينده توره دي.

شوسبب كمبغل اهالي صفتي پس بوليشيگه قره مسدن خارجي قالين ومكيت لرني قيزيقيب آله ياتگن لري ايتيله دي.

خارجي قالين ومكيت ساتيله ديگن دكانلر شهرنينگ ایریم نقطه لريده هم كوزه تيش ممكن.

اوتميشلرده بو مركزده اهالي تمانيدن تيارلنه ديگن قول صنعتي بوجمله دن گيلم وقالين دن باشقه نرسه ني كورمسدينگيز اما هلي بيرقطاردكان لرده خارجي فابريكه ده ايشلب چيقاريله ديگن قالين ومكيت ايسه كوپ كورينه دي.

فاريابليك گيلم فروش لردن حاجي خيرمحمد گليم صنعتي رواجله نيب و پاكستان صنعتي حسابلنمي، افغانستان آتيگه اوتيشي اوچون دولت تمانيدن جدي اعتبار قره تيليشي ني طلب قيله دي.

گيلم نينگ كته قسمي پاكستانگه آليب كيتيلسه ده قالگن قسمي ني اهالي اوزي آلردي اما سونگي وقت لرده ايران پولي اوز بهاسي ني قولدن بيريب باشقه پوللرمقابليده ارزانله شيب كيتگني سبب ايران ده بولگن افغان لركوپ مبلغ عايله لريگه يوباره آلمسليك لري هم گيلم بازاري گه سلبي تاثير قويگني ايتيله دي.

بيرقنچه گيلم فروش لرگه كوره، سونگي ييللرده خارجي لركيليب بوماركيت دن گيلم وقالين ساتيب آلرديلر اما سونگي وقت لرده خارجي خريدارلرهم كيلمه ياتگني ني ايته ديلر.

بو صنعت كوپراق عيال قتلمي تمانيدن تيارلنه دي افغانستان ني حسابگه آلگن ده فارياب ولايتي بوصنعت ني اينگ كوپ ايشلب چيقاره ديگن ولايت لريدن بولگن سونگي يريم عصرده بوصنعت اوزنفيس ليگي وبردوامليگي بيلن بيرقطارغربي مملكت لر اعتباريني جلب قيلگن ايدي شو سبب بوشغل اوتگن بير نيچه اون ييلده رواجله نيب بونينگ درآمدي آرقه لي كوپچيليك اهالي كون كيچيريب كيلرايديلر اما سونگي اون ييلده بو صنعت رواجلنمي بلكه كونمه كون بازاري يمانله شيب و اورته دن كيتيش مساله سي بيرقطارلرني خواطرلريگه سبب بولگن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.