BBC navigation

بو ییلده گی کانکور سیناویده بلند نمره نی غورلیک بیر ییگیت آلگن

Сўнгги янгиланиш 2 март 2013 - 13:02 GMT

اوتگن ییلده گی کانکور سیناویده نتیجه سیز قالگن ییگیت، افغانستان جاری ییلده گی کانکور سیناوی نینگ بیرینچی سینی آلگن.

عبدالجبار اوغلی عبدالقاسم، غور ولایتی مرکزی چغچران شهریدن قریب 30 کیلومتر اوزاققه جایلشگن آهنگران قشلاقی نینگ یشاوچی سی دیر.

22 یاشلی عبدالقاسم، ایککی فرزند آته سی بولیب همده سواد سیز بیر عایله گه تیگیشلی شخص دیر.

افغانستان عالی اوقویورتلر وزیرلیگی، کانکور سیناویده یخشی نمره لرنی قازانگن لرگه مخصوص امتیازلر قایل. بو شخص لرنی عالی تحصیلات اوچون خارجی مملکت لرگه هم جونه ته دی.

او بیلتیرکی کانکور سیناویده 363 نمره قازانیب نتیجه سیز قالگن ایدی اما امید و ایسته گی نی قولدن بیرمه ی، غور ولایتی قوشنی سی هرات گه کیتیب درس اوقیش نی دوام بیرگن.

اما چیکگن زحمت لری نتیجه سی، کوتیله دیگن نرسه دن هم کوپراق بولگن.

" مین اصلن بو تصورده ایمس ایدیم که بیرینچی نمره نی آلسم. ایندی انچه خرسند من. چونکه بو مقام کوپ یخشی بیر مقام. هم اوزیم اوچون هم مین یشه یاتگن ولایتیم یعنی غور اوچون. درس اوقیاتگن برچه دوستم لریگه ایته دیگن گپیم شو کی کوپ سعی و حرکت قیلسین لر. درس اوقیش اوزی قیین بیر نرسه شو اوچون انچه سعی و حرکت لرگه احتیاجی بار. و حاضر مملکتده درس اوقیش زمینه لر کینگ شکلده یره تیلگن."

بو مسئله عبدالقاسم نینگ عایله سیگه هم انچه قوانچ بخشله گن. شو نینگ دیک اونینگ درس اوقیشی اوچون حمایت قیله یاتگن شخص آته سی بولگن.

"مین اوغلیم گه ایتگن من که سین ایش قیلیشینگنی ایسته میمن فقط درس اوقیگین. نفقه مسئوولیتی نی اوزیم حیاتده بولگنیم چه بویینیم گه آلگن من. و اونی درس گه تشویق قیلگن من. و برچه امکانیت لرنی مین یره تیشگه سوز بیرگن من".

شو نینگ دیک عبدالقاسم همشیره سی هم ایناغه سی کانکور سیناویده بیرینچی نمره نی قازانگنی اوچون اوز خرسند لیگی نی بونده ی بیان ایته دی.

" مین برچه یاش لرگه ایته دیگن گپیم شو که درس اوقی سین لر زحمت چیکسین لر، اوشنده ی که ایناغم افتخارکسب قیلگن اولر هم شونده ی بیر افتخارنی کسب قیلسین لر."

عبدالقاسم تورت ییل ایلگری اویلندی و حاضر ایککی فرزند آته سی دیر. هرچند او، باشقه لر گه درس اوقیش دن آلدین اویلنمسلیگی نی توصیه قیله دی لیکن اونگه بولگن عایله نه فقط درس اوقیشگه توسیق یره تمه گن بلکه افغانستان نینگ 1391 نچی قویاش ییلیده گی کانکوریده بیرینچی اوریننی اوزیگه ایگه لگنیگه زمین یره تگن.

بو ییلده گی کانکور سیناویده ایککینچی نمره نی اوزیگه ایگله گن هم غور ولایتیدن بولگن ذبیح الله ناملی بیر ییگیت دیر. اما افغانستان نینگ کمبغل همده اوزاققه جایلشگن دایکندی ولایتی هم جاری ییلده گی کانکور سیناوییده ریکورد باغله گن.

کانکور نتیجه سی نینگ روی خطیده گی بیرینچی دن تا اوچینچی صحیفه سی گه چه مذکور ولایت نینگ اوتیز دن تا اوتیز بیش یاش ییگیتلر اسم لری ذکر ایتیلگن.

عالی اوقویورت لر وزیرلیگیگه کوره، کانکور سیناویده قتنه شگن 175 مینگ شخص دن، 44 مینگ نفر عالی تعلیم درگاه لریگه یول تاپگن لر. بونگه علاوه 30 مینگ باشقه شخص لرگه هم معارف وزیرلیگیگه تیگیشلی تعلیمی موسسه لرگه تعلیم زمینه سی یره تیلگن.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.