BBC navigation

بگرام قماقخانه مسوولیتی افغان لرگه تاپشریلدی

Сўнгги янгиланиш 25 март 2013 - 13:10 GMT

کوپ وقتدن بیری افغانستان و امریکا ارا جنجللی بیر مسله گه ایلنگن بگرام قماقخانه سی مسووللیتی، نهایت ده بوگون رسمی شکلده چیت ایل کوچلری تمانیدن افغانستان دولتی گه تاپشیریلدی.

افغان رسیملریگه کوره، اوتگن ییل ایکله مملکت رسمیلری ارا عملگه آشیریلگن کیلیشووگه ینآ، 4 مینگ محبوس اوشبو تورمه دن افغانستان دولتیگه تاپشیریلگن.

اوشبو تورمه، امریکالیک کوچلری نینگ افغانستان ده گی تورمه لریدن بیری بولیب، انسان حقلری تشکیلاتی هردایم مذکور تورمه ده قیناق و ناتوغری یانده شوولر عملگه آشیریله یاتگنی دن خواطر بیلدیریب کیلگن ایدی.

اوشبو قماقخانه مسوولیتی بوتونلی روشده ایکله مملکت ارا عملگه آشیریلگن کیلیشوو اساسیده، افغانستان مدافعه وزیری بسم الله محمدی و آیساف نینگ اوشبو مملکتده گی باش قوماندانی جنرال دانفورد ارا بیر بیتیم اساسیده افغانستان دولتی گه تاپشیریلدی.

افغانستان ملی مدافعه وزیرلیگی نینگ حربی پولیس باش قوماندانی تورنجنرال غلام فاروق بارکزی، اوتگن ییل افغانستان وامریکا ارا امضالنگن کیلیشوونامه دن حاضرگچه، بگرام ده گی محبوسلردن 4 مینگ ته سی نینگ مسوولیتی خارجی کوچلردن افغان کوچلریگه تاپشیریلگنی نی ایتدی.

او، اوشبو مدت ایچیده 1350 محبوس قوییب یوباریلگن و بوگون هم 26 محبوس آزاد ایتیلگنی نی معلوم قیلدی:" بیز 6 قوس دن بویان 949 ته محبوس نی امریکا لیک لر تمانیدن تسلیم آلدیک، مجموعآ تورت مینگ محبوس امریکا لیک کوچلری طرفیدن افغانستان دولتی گه تاپشیریلدی. چیکلنگن بیر تعداد محبوس امریکالیکلرنینگ قولیده قالگن اولر هم کیله سی هفته ده بیز گه تاپشیریله دی."

حربی پولیس باش قوماندانی گه کوره، خارجی کوچلری بوندن کیین، فقطگینه ظرفیتلرنی یوکسلتیریش و مصلحت بیریش بولیملریده افغان کوچلری بیلن همکارلیک قیله دی.

اونینگ ایتیشیچه، یوز دن آزیراق افغان محبوسی، هنوز هم بگرام ده گی خارجی کوچلر نینگ اخیتاریده قالگن، اما اولرنینگ سقلش مسوولیتی کیله سی هفته افغانستان دولتیگه تاپشیریلیشی ممکن.

بارکزی شونینگ دیک، مذکور تورمه ده کون کیچیره یاتگن باشقه 50 گه یقین خارجی محبوس نینگ سقلش مسوولیتی افغانستان دولتی ایمس، بلکه خارجلر گه باغلیق ایکنی حقیده تاکیدله دی.

خارجی کوچلردن افغانستان دولتی گه خوفسیزلیک مسوولیتلرنی تاپشیریش کمیسیونی رییسی اشرف غنی احمدزی، بوگون مراسمده چیقیش قیلیب، اوشبو تدبیردن سونگ، ایکله مملکت ارا علاقه لریده کینگ اوزگریش روی بیریشی نی ایتدی:"بگرام قماقخانه سی مسوولیتی تاپشیریلیشی جریانی تکمیل بولیشی بیلن، بیز تاریخ صحیفه سیده بیر اوزگریش گه گواه بولدیک، امریکا وافغانستان ارا علاقه لری ده اوته مهم اوزگریش یوزبیرگن."

احمدزی ، امریکا بگرام قماقخانه سی مسوولیتی تاپشیریلیشی بیلن، افغانستان ملی حاکمیتی نی تن آلیب، هر بیر افغان مملکت قانونلری اساسیده حبسگه آلینیب، محکمه ایتیله دی دیدی.

آیساف کوچلری نینگ افغانستانده گی باش قوماندانی جنرال جوزف دانفورد، بگرام قماقخانه سی مسوولیت نی تاپشیریش مراسمی ده، اوشبو تدبیر امریکا و افغانستان ارا مناسبتلریده ینگی اوزگریش یوز بیرگنی نی ایتدی.

ادانفورد گه کوره، اوشبو تدبیر ایکله مملکت نینگ مناسبتلرینی تاباره کوچه ی تیره دی.

او، اوتگن اون بیر ییل ایچیده، قولگه کیلگن برچه یوتوقلر، امریکا وافغانستان نینگ قوشمه جانبازلیکلری نتیجه سیده ایکنی نی معلوم قیلدی.

بوندن آلدین افغانستان جمهور رییسی حامدکرزی اوشبو مملکت نینگ قانونیگه بنآ، خطرلی محبوسلر بیر علیحیده تورمه ده سقلنیشی باره سیده وعده قیلگن.

بگرام قماقخانه سی، امریکا لیک کوچلری نینگ افغانستانده گی قماقخانه لریدن بیری بولیب، دولت همده انسان حقلری تشکیلاتلری تمانیدن تعین لنگن هیات بار بار اوشبو تورمه ده قییناق، ناتوغری یانده شوو، توهین، سوکیش و اولرنی سطر سیز قیلیش حالتلری حقیده خبر بیرگن ایدیلر.

اوتگن ییل اوشبو تورمه ده گی محبوسلر دن اوچ مینگ دن آرغیغی افغانستان دولتی گه تاپشیریلگن.

اوشبو تورمه نینگ مسوولیتی نی تاپشیریش جریانی، اوتگن حوت آیی نینگ 19 ده عملگه آشیریلیشی ایتیلردی، اما اوشبو جریان کیچیکتیریلیب، امریکا مدافعه وزیری بونگه بیرقطار تخنیکی معمالرنی سبب قیلیب کورستگندی.

BBC © 2014 BBC tashqi sahifalar uchun ma'sul emas.

Ushbu sahifani CSS veb-brauzerida tomosha qilgan ma'qul. Hozirgi veb-brauzeringiz Sizga to'la vizual imkoniyatni bermaydi. Marhamat qilib o'zingizning brauzeringizni CSS veb-brauzeriga yangilash haqida o'ylab ko'ring.